کویت اردو نیوز : امریکا کے دارالحکومت واشنگٹن ڈی سی میں اسرائیلی سفارت خانے کے باہر ایک شخص نے خود کو آگ لگالی، جسے فوری طور پر اسپتال لے جایا گیا تاہم وہ جانبر نہ ہوسکا۔
مقامی پولیس نے سوشل میڈیا پر کہا، "امریکی خفیہ سروس کی مدد کے لیے کچھ افسران کو روانہ کیا گیا جب ایک شخص نے سفارت خانے کے سامنے خود کو آگ لگا لی اور اسے تشویشناک حالت میں قریبی اسپتال لے جایا گیا۔” تاہم بعد میں وہ ہسپتال میں زخموں کی تاب نہ لاتے ہوئے چل بسا۔
امریکی میڈیا اور گارڈین کی رپورٹ کے مطابق یہ واقعہ 25 فروری کو مقامی وقت کے مطابق دوپہر ایک بجے پیش آیا۔
اس واقعے کی واشنگٹن پولیس ڈیپارٹمنٹ دیگر متعلقہ حکام کے ساتھ مل کر تحقیقات کر رہی ہے۔ امریکی میڈیا نے امریکی فضائیہ کے ترجمان کے حوالے سے بتایا کہ یہ شخص امریکی ایئر مین تھا۔
امریکی فضائیہ کے ترجمان نے اس شخص کو اپنی ٹیم کا حصہ قرار دینے یا شناخت کرنے سے انکار کر دیا ہے۔
اسرائیلی سفارت خانے نے ردعمل دیتے ہوئے کہا کہ اس کا کوئی عملہ زخمی نہیں ہوا ہے۔ اسرائیلی وزارت خارجہ نے ایک بیان میں کہا کہ یہ شخص اس کے سفارت خانے کے عملے کا حصہ نہیں تھا۔
امریکا میں اسرائیلی سفارتخانہ فلسطینی حامی مظاہرین کے احتجاج کا مرکز بن گیا ہے جہاں لوگ غزہ میں اسرائیلی فوج کی جنگ کے خلاف فوری جنگ بندی کا مطالبہ کر رہے ہیں۔
