کوہت اردو نیوز 07 ستمبر: پاکستان نے سنسنی خیز مقابلے کے بعد افغانستان کو ایک وکٹ سے شکست دے دی، اسی فتح کے ساتھ بھارت اور افغانستان ایشیا کپ سے باہر ہوگئے۔
تفصیلات کے مطابق 130 رنز ہدف کے تعاقب پاکستان نے آخری وکٹ کے نقصان پر چار گیندوں قبل پورا کرلیا، فاسٹ بولر نسیم شاہ 2گیندوں پر2چھکےلگاکرمیچ جتوایا، فاسٹ بولر نے چار گیندوں پر 14 بنائے اور مرد میدان قرار پائے۔ افغانستان کی جانب سے فضل اللہ فاروقی اور فرید احمد نے تین تین کھلاڑیوں کو آؤٹ کیا، راشد خان کے حصے میں دو وکٹ آئیں۔ اس سے قبل شارجہ کرکٹ اسٹیڈیم میں کھیلے گئے ایشیا کپ کے بڑے مقابلے میں پاکستانی کپتان بابراعظم نے ٹاس جیت کر افغانستان کو پہلے بیٹنگ کی دعوت دی۔ پاکستان کی جانب سے شاداب خان 36، افتخار احمد 30 رنز بنا کرنمایاں رہے۔ افغان ٹیم نے مقررہ 20 اوورز میں 6 وکٹوں کے نقصان پر 129 رنز بنائے ،
ابراہیم زادران 35 رنز بنا کرٹاپ اسکورر رہے، حضرت اللہ زازئی21اورکریم جنت 15رنزبناسکے، راشد خان نےاختتامی اوورز میں 18 رنزکی اننگز کھیلی۔ پاکستان کی جانب سے حارث روف نے 2 کھلاڑیوں کو آؤٹ کیا، نسیم شاہ،محمدنوازاورشاداب خان نے بھی ایک ایک وکٹ حاصل کی۔
میچ کے آغاز پر گفتگو کرتے ہوئے قومی ٹیم کے کپتان بابراعظم کا کہنا تھا کہ پچ بہت اچھی نظرآرہی ہے، انہوں نے کہا کہ ہدف کے تعاقب میں جیت ہمیشہ اعتماد دیتی ہے۔فائنل الیون میں تبدیلی سے متعلق سوال پر بابراعظم نے بتایا کہ افغانستان کیخلاف میچ کے لئے پاکستان ٹیم میں کوئی تبدیلی نہیں کی گئی ہے۔
افغان کپتان محمد نبی نے ٹاس کے بعد گفتگو میں کہا کہ میں بھی ٹاس جیتتا تو پہلے فیلڈنگ کا ہی فیصلہ کرتا، اب پاکستان کے خلاف بہترین بلے بازی کا مظاہرہ کرتے ہوئے بڑا اسکور کرنے کی کوشش کرینگے۔
محمد نبی نے بتایا کہ آج کے میچ کے لئے ٹیم میں دو تبدیلیاں کیں ہیں، سمیع اللہ شنواری کی جگہ عظمت اللہ عمرزئی اور نوین الحق کی جگہ فرید احمد کو ٹیم میں شامل کیا گیا ہے۔
افغان ٹیم کے لیے آج کا مقابلہ ڈو اور ڈائی ہے، پاکستان کی جیت کی صورت میں سری لنکا کو بھی فائنل کا ٹکٹ مل جائے گا، جب کہ بھارت اور افغانستان کا سفر تمام ہو جائے گا۔
افغانستان کے خلاف 2 چھکے لگا کر ٹیم کو فتح دلانے والے نسیم شاہ نے کہا ہے کہ اب سب بھول گئے ہیں کہ میں بولر بھی ہوں۔ میچ کے اختتام پر گفتگو کرتے ہوئے نسیم شاہ نے کہا کہ پورا بھروسہ تھا کہ ہم میچ جیت سکتے ہیں
نیٹ میں پریکٹس کرتے ہیں اس لیے یہ یہی اعتماد تھا کہ ہم ہدف پورا کر لیں گے۔ انہوں نے کہا کہ جانتا تھا کہ بولر یارکر کرنے کی کوشش کرے گا اور مجھے یقین تھا کہ میں چھکے مار سکتا ہوں اور ایسا ہی ہوا کوشش کی جو پوری ہو گئی۔نسیم شاہ نے بتایا کہ آصف علی کے آوٹ ہونے کے بعد حسنین کے پاس گیا اور بلا تبدیل کیا، پریکٹس کی ہوئی تھی اور اعتماد تھا کہ ہم یہ کر پائیں گے۔ ابھرتے ہوئے اسٹار کھلاڑی نے مسکراتے ہوئے کہا کہ لگتا ہے اب مجھے لوگ بھول گئے ہیں کہ میں بولر بھی ہوں۔
