کویت سٹی 07 جولائی: روزنامہ الأنباء کی رپورٹ کے مطابق کویت نے سرکاری طور پر ڈیجیٹل سول ID کی منظوری دے دی ہے۔
تفصیلات کے مطابق نائب وزیراعظم وزیر داخلہ اور وزیر مملکت برائے کابینہ امور انس الصالح نے آج ایک فیصلہ جاری کیا جس میں "کویت موبائیل آئی ڈی” ایپلیکشن کے ذریعے حاصل کردہ ڈیجیٹل سول آئی سرکاری اور غیر سرکاری اداروں میں لین دین کے معاملات کے لئے استعمال کرنے کی منظوری دے دی جس کے نتیجے میں حکومتی اور غیر حکومتی اداروں میں کوئی بھی فرد اپنی شناخت کے لئے ڈیجیٹل سول آئی ڈی کا استعمال کرسکتا ہے۔
پبلک اتھارٹی فار سول انفارمیشن (پی اے سی آئی) نے قبل ازیں ایک آن لائن سول آئی ڈی ایپ "کویت موبائل آئی ڈی” لانچ کی تھی جس کے استعمال سے شہری اور تارکینِ وطن اپنے سمارٹ فونز پر اپنا سول شناختی کارڈ لے سکتے ہیں تاہم سرکاری طور پر اسکے استعمال کی منظوری حاصل نہیں تھی۔
فیصلے میں یہ بھی کہا گیا ہے کہ "کویت موبائل آئی ڈی” کا اطلاق سرکاری اور غیر سرکاری الیکٹرانک خدمات تک محفوظ رسائی اور کسی بھی الیکٹرانک لین دین کے لئے منظور شدہ دستخط کے طور پر فراہم کیا جا سکے گا۔
یاد رہے کہ معیاد ختم ہونے والے سول کارڈ کی تجدید لازم ہے تاکہ "کویت موبائل آئی ڈی” کی ایپلیکیشن پر موجود خدمات کا فائدہ حاصل کیا جائے۔