کویت اردو نیوز، 3 مئی: سعودی عرب میں چھٹیاں منانے پر فرنچ کلب پیرس سینٹ جرمین( پی ایس جی) نے اسٹار فٹبالر لیونل میسی کو 2 ہفتے کے لیے سسپنڈ کر دیا۔
2021 میں ارجنٹائن کے معروف فٹ بال اسٹار لیونل میسی نے ہسپانوی فٹ بال کلب بارسلونا سے جدا ہونے کے بعد قطری ملکیت کے فرنچ کلب پیرس سینٹ جرمین سے دو سال کا معاہدہ کیا تھا۔
لیونل میسی ان دنوں فیملی کے ہمراہ چھٹیاں منانے سعودی عرب میں موجود ہیں۔ جس پر پیر کے روز سعودی وزیر سیاحت احمد الخطیب نے ٹوئٹر پر لیونل میسی کو سعودی عرب میں خوش آمدید کرتے ہوئے کہا کہ’ مجھے سعودی عرب کے سیاحتی سفیر لیونل میسی اور ان کی فیملی کا سعودی میں دوسری بار چھٹیاں منانے پر خوش آمدید کہتے ہوئے خوشی ہو رہی ہے’۔
بعد ازاں سعودی وزیر سیاحت احمد الخطیب نے میسی اور ان کے اہل خانہ کی سعودی عرب میں چھٹیاں مناتے ہوئے کچھ تصاویر بھی ٹوئٹر پر اپ لوڈ کیں۔
لیونل میسی سعودی عرب کے وزارت سیاحت کے پروموشنل برانڈ وزٹ سعودی کے سفیر بھی ہیں۔
تاہم بغیر اجازت سعودی عرب کا دورہ کرنے پر فرنچ کلب پی ایس جی نے لیونل میسی کو دو ہفتے کے لیے معطل کر دیا۔
کلب کے مطابق دو ہفتے کی سسپنشن کے دوران میسی نہ ہی کلب کے کھلاڑیوں کے ساتھ پریکٹس کرسکتے ہیں اور نہ ہی انہیں کوئی میچ کھیلنے کی اجازت ہے۔
اس کے علاوہ میسی پر سعودی عرب میں سیاحت کے سفیر کے طور پر ذمہ داری نبھانے پر کلب کی جانب سے جرمانہ بھی عائد کیا گیا ہے۔
میسی نے پی ایس جی سے کھیلتے ہوئے 71 مقابلوں میں31 گول کیے جبکہ34 اسسٹ کیے، ان کا فرانسیسی کلب کے ساتھ دو سالہ معاہدہ رواں سال ختم ہوجائے گا
