کویت اردو نیوز،2جون: ترجمان مذہبی امور کا کہنا ہے کہ ملک کے دس ائیرپورٹس سے پاکستانی عازمینِ حج کی سعودی عرب آمد کا سلسلہ جاری ہے اور اب تک 53 پروازوں کے ذریعے 31 ہزار 241 پاکستانی عازمینِ حج سعودی عرب پہنچ چکے ہیں۔
ترجمان مذہبی امور کے مطابق ، 27 ہزار سے زائد پاکستانی عازمین حج مدینہ منورہ میں قیام پزیر ہیں، 4 ہزار سے زائد عازمینِ حج جدید بسوں کے ذریعے مکہ مکرمہ پہنچ گئے۔
ترجمان مذہبی امور نے مزید بتایا کہ پاکستان سے جدہ ایئرپورٹ پر براہ راست پروازوں کا سلسلہ 5 جون سے شروع ہو گا، شعبہ گمشدگی و بازیابی نے راستہ بھولنے والے 25 عازمین کو انکی رہائش گاہوں تک پہنچایا، عازمین کرام کے 166 گمشدہ بیگ ڈھونڈ کر مالکان کے حوالے کیے اور 06 کی تلاش جاری ہے۔
وزارتِ مذہبی امور کے تحت شعبہ شکایات، حرم گائیڈز، شعبہ خوراک، رہائش و ٹرانسپورٹ مصروف عمل ہیں،
پاکستان حج میڈیکل مشن کے تحت 137 ڈاکٹرز اور پیرا میڈیکل عملہ، خصوصی مانیٹرنگ ٹیمز عازمینِ حج کی طبی و دیگر ضروریات کیلئے تعینات ہیں۔
مذکورہ بالا عملہ نے سہولیات کا جائزہ لینے کیلئے مختلف رہائش گاہوں کے دورے بھی کیے ہیں
