کویت اردو نیوز،5اگست: وزیراعظم شہباز شریف نے قومی اسمبلی تحلیل کرنے کی تاریخ کا اعلان کرتے ہوئے کہا ہے کہ موجودہ حکومت کی مدت پوری ہونے سے تین روز قبل ہی 9 اگست کو قومی اسمبلی تحلیل کردی جائیں گی۔
وزیراعظم ہاؤس اسلام آباد میں اتحادی جماعتوں کے ارکانِ پارلیمنٹ کے اعزاز میں دیے گئے عشائیے سے خطاب میں انہوں نے کہا کہ 15 ماہ میں تمام تنقید کے باوجود ریاست کو بچایا۔آج ہمارا ضمیر مطمئن ہے کہ ہم نے سیاست کی قربانی دے کر ملک کو بھنور سے نکالا۔ مشکل وقت میں حکومت سنبھالی، ہر طرف خطرات تھے۔
انہوں نے مزید کہا کہ آئندہ چند روز میں ہماری حکومت ختم ہو جائے گی۔ کوشش ہے کہ سب کے لیے قابل قبول نگراں سیٹ اپ تشکیل دیا جائے۔
وزیراعظم کا مزید کہنا تھا کہ اتحادی حکومت کے تعاون سے ہر مشکل پر قابو پایا۔ آئی ایم ایف سے معاہدہ آسان نہیں تھا، یہ پل صراط بھی عبور کیا.
وزیراعظم نے بروز جمعہ نگران سیٹ اپ کے حوالے سے اتحادیوں کے ساتھ بات چیت کا حتمی دور کا آغاز کیا، اس بات چیت کی کم از کم 3 روز تک مکمل ہونے کی توقع ہے۔
