کویت اردو نیوز،26 ستمبر: حکومت برطانیہ کیجانب سے کیے گئے ایک سروے میں نکمے نوجوانوں کی فہرست جاری کردی گئی، جس میں پاکستانیوں نے میدان مار لیا ہے کیونکہ برطانیہ میں 16 سے 24 سال کے پاکستانی نژاد نوجوانوں کی اکثریت نہ تو ملازم پیشہ ہے اور نہ ہی تعلیم حاصل کر رہی ہے۔
تفصیلات کے مطابق برطانوی حکومت نے نکمے اور بیروزگار نوجوانوں کے اعداد وشمار جاری کردیئے ، جن میں پاکستانی نژاد برطانوی نوجوان سرفہرست ہیں۔
سروے رپورٹ میں بتایا گیا کہ برطانیہ میں اوسطاً ساڑھے گیارہ فیصد نوجوان نہ تو تعلیم حاصل کر رہے ہیں اور نہ ہی کوئی روزگار ۔
رپورٹ کے مطابق ان نوجوانوں میں سب سے زیادہ شرح پاکستانی نژاد نوجوانوں کی ہے، جو 14.3 فیصد ہے، جس کے بعد بارہ فیصد بنگلہ دیشی نژاد نوجوان ہے۔
سروے رپورٹ میں 11.7 فیصد برطانوی سفید فام، 11.5 فیصد سیاہ فام، جبکہ 11.3 فیصد دیگر ایشیائی ممالک سے تعلق رکھنے والے برطانوی نوجوان تعلیم اور تربیت سمیت کسی ملازمت کا حصہ نہیں۔
دوسری جانب 16 سے 24 سال کی عمر کے بھارتی اور چینی نوجوان برطانیہ میں مقیم دیگر قومیتوں کے نوجوانوں کے مقابلے میں تعلیم، تربیت اور ملازمت میں آگے ہیں۔
