کویت اردو نیوز ، 14 اکتوبر 2023: لاس اینجلس اولمپکس 2028 میں کرکٹ کے کھیل کو شامل کرنے کی منظوری دے دی گئی ہے۔
میڈیا رپورٹس کے مطابق کرکٹ کو اولمپکس کی تاریخ میں صرف دوسری بار اولمپک گیمز میں شامل کیا جا رہا ہے، انٹرنیشنل اولمپک کمیٹی (آئی او سی) کے ایگزیکٹو ممبران نے 13 اکتوبر کو اس فیصلے کی منظوری دی۔
کرکٹ آخری بار 1900 میں اولمپکس میں کھیلا گیا تھا، جس کا فائنل انگلینڈ اور فرانس کے درمیان ہوا تھا، ہالینڈ اور بیلجیئم نے ایونٹ سے دستبرداری اختیار کر لی تھی۔
انٹرنیشنل اولمپک کمیٹی کے صدر تھامس باخ نے کہا کہ اولمپکس میں کرکٹ کو شامل کرنے کا فیصلہ لاس اینجلس کے منتظمین کی درخواست کے بعد کیا گیا، ٹی ٹوئنٹی کرکٹ کا ورژن، بین الاقوامی مقابلوں کا تیز ترین اور سب سے زیادہ دلچسپ ہے ، اس فارمیٹ کو اس کے زبردست سنسنی اور وسیع پیمانے پر مقبولیت کی وجہ سے سب سے بڑے پلیٹ فارم پر کرکٹ کی نمائندگی کے لیے منتخب کیا گیا تھا۔
انہوں نے کہا کہ 2028 کے لاس اینجلس اولمپکس میں کرکٹ اپنا ڈیبیو کرے گی تاہم دیگر کئی کھیل بھی کھیلے جائیں گے۔
آرگنائزنگ کمیٹی کی طرف سے تجویز کردہ اضافی کھیلوں میں سافٹ بال، ٹی 20 کرکٹ، فلیگ فٹ بال اور اسکواش شامل ہیں۔
واضح رہے کہ اولمپک کمیٹی کے ارکان آئندہ پیر کو ہونے والے ریفرنڈم میں ووٹ دیں گے ، جس کے بعد کھیلوں کی شمولیت کا حتمی اعلان کیا جائے گا۔
128 سال بعد اولمپک گیمز میں کرکٹ کی واپسی کا امکان روشن ہو گیا ہے، جس میں 2028 لاس اینجلس گیمز میں مردوں اور خواتین کے مقابلوں میں پانچ ٹیموں کو میدان میں اتارنے کا منصوبہ ہے۔
