کویت اردو نیوز ، 16 اکتوبر 2023: امریکی پولیس نے ریاست الینوائے میں ایک 71 سالہ شخص کو چھ سالہ بچے کو مسلمان ہونے کی وجہ سے قتل کرنے کے الزام میں گرفتار کیا ہے۔
جوزف زوبا نامی شخص پر الزام ہے کہ اس نے چھ سالہ بچے کو قتل کیا جبکہ اس کی 32 سالہ ماں کو زخمی کر دیا۔
پلین فیلڈ، الینوائے میں ول کاؤنٹی شیرف کے دفتر نے ایک بیان میں کہا کہ جوزف نے اسرائیل اور حماس کے درمیان جاری تنازعہ کی وجہ سے دونوں کو نشانہ بنایا۔
پولیس نے جوزف زوبا کے خلاف قتل سمیت نفرت انگیز جرائم کا مقدمہ بھی درج کر لیا ہے۔
پولیس کے ایک بیان میں کہا گیا ہے کہ ہفتے کی صبح شیرف کے دفتر کو ایک خاتون کی طرف سے ہنگامی فون کال موصول ہوئی جس نے کہا کہ اس کے مالک مکان نے اس پر حملہ کیا ہے۔
پولیس کے بیان میں کہا گیا ہے کہ خاتون نے کہا کہ وہ باتھ روم میں بھاگی اور حملہ آور سے لڑتی رہی۔
تاہم جب پولیس موقع پر پہنچی تو انہوں نے دیکھا کہ خاتون اور اس کے بچے کے سینوں، پیٹ اور بازوؤں پر کئی بار وار کیے گئے تھے۔
پولیس نے ماں بیٹے کی شناخت جاری نہیں کی۔ دونوں کو ہسپتال لے جایا گیا لیکن بچہ دم توڑ گیا۔ بعد میں پتہ چلا کہ ملزم نے بچے پر چھری سے 26 وار کیے تھے۔