کویت اردو نیوز ، 17 اکتوبر 2023: اسرائیل نے غزہ پر حملوں کے نئے طریقوں کی دھمکی دیتے ہوئے کہا ہے کہ سب غزہ پر بری فوج کی ممکنہ کارروائی کو جنگ کا اگلا مرحلہ تصور کر رہے ہیں تاہم اس بار کچھ نیا ہو سکتا ہے۔
عالمی خبر رساں ادارے کے مطابق اسرائیل نے غزہ کے شہریوں کو انخلاء کا الٹی میٹم دے دیا ہے جس کے بعد اس کی فوج بڑے حملے کی تیاری کر رہی ہے جب کہ اسرائیلی فضائیہ پہلے ہی بمباری کر رہی ہے۔
دوسری جانب غزہ کی ناکہ بندی کرکے اسرائیل نے بجلی اور خوراک کی سپلائی روک دی ہے جس پر کئی ممالک نے اسرائیل سے ناکہ بندی ختم کرنےاور غزہ پرزمینی حملےسےبازرہنے کاپرزورمطالبہ کیا ہے۔
اس حوالے سے اسرائیلی فوج کے ترجمان کا کہنا تھا کہ ہر کوئی سمجھتا ہے کہ غزہ میں فوجی آپریشن اب زمینی آپریشن ہو گا تاہم جنگ کا اگلا مرحلہ جس کی ہم تیاری کر رہے ہیں وہ کچھ نیا ہو سکتا ہے۔
اسرائیلی فوج کے ترجمان نے ڈھٹائی سے کہا کہ وہ بین الاقوامی قوانین کے تحت غزہ پر ہتھیار استعمال کر رہے ہیں کیونکہ وہاں ابھی تک انسانی بنیادوں پر جنگ بندی نہیں ہوئی ہے۔
غزہ کی ناکہ بندی کے بعد مصر نے رفح بارڈر کراسنگ کو بھی بند کر دیا ہے جس کی وجہ سے لاکھوں فلسطینی پھنسے ہوئے ہیں اور ان تک انسانی امداد نہیں پہنچ سکتی۔
واضح رہے کہ غزہ پر اسرائیل کے حملے میں اب تک 3 ہزار کے قریب فلسطینی شہید ہوچکے ہیں جن میں ایک ہزار سے زائد خواتین اور بچے بھی شامل ہیں۔
