کویت اردو نیوز ، 19 اکتوبر 2023 : غزہ شہر کے الاہلی اسپتال پر اسرائیل کے حملے کے بعد عالمی شہرت یافتہ ترک سیریز "کرولوس عثمان” کے 5ویں سیزن کو روک دیا گیا ہے۔
ترک سیریز ‘کورولوش عثمان’ کا 5 واں سیزن شروع ہو گیا ہے اور سیریز کی نئی قسط گزشتہ روز نشر کی جانی تھی لیکن گزشتہ روز نئی قسط کے بجائے پرانی قسط نشر کی گئی۔
تاہم اب ’کورولوس عثمان‘ کی پروڈکشن ٹیم نے سیریز کی نئی قسط نشر نہ کرنے کی وجہ بتا دی، اس حوالے سے انہوں نے اپنے آفیشل انسٹاگرام ہینڈل پر پوسٹ کیا۔
سیریز کی پروڈکشن ٹیم نے شائقین کو آگاہ کرتے ہوئے کہا کہ غزہ کے ہسپتال پر اسرائیلی فوج کے حملے میں ہمارے ہزاروں بے گناہ فلسطینی بہن بھائی شہید ہوئے، جس پر ہمارے ملک میں 3 روزہ قومی سوگ کا اعلان کیا گیا ہے ، اس وجہ سے سیریز کے 5ویں سیزن کا نیا ایپی سوڈ ‘کرولس عثمان’ نشر نہیں کیا جائے گا۔
انہوں نے اپنی پوسٹ میں اسرائیلی بمباری کو انسانیت کے خلاف جرم قرار دیتے ہوئے فلسطینی عوام، بچوں اور خواتین کی شہادت کی شدید مذمت کی۔
واضح رہے کہ غزہ کے الاہلی اسپتال پر اسرائیلی فضائی حملے میں معصوم فلسطینی بچوں اور خواتین کی شہادت کے بعد پوری دنیا میں شدید غم و غصہ پایا جاتا ہے اور صہیونی فوج کے خوفناک اور غیر انسانی جنگی جرم کی شدید مذمت کی جارہی ہے۔
بدھ کو مشرق وسطیٰ کے مختلف ممالک میں پرتشدد مظاہرے کیے گئے۔ لبنان، اردن، یمن، مصر، تیونس اور مقبوضہ مغربی کنارے میں ہزاروں افراد غزہ کے شہریوں سے اظہار یکجہتی کے لیے سڑکوں پر نکل آئے جب کہ امریکا اور بھارت اسرائیل کی حمایت کر رہے ہیں۔