کویت اردو نیوز ، 30 اکتوبر 2023: بھارت میں ایک اور ملیالم اداکارہ کی موت کی خبر سامنے آگئی، اداکارہ رنجوشہ مینن اپنے فلیٹ میں مردہ پائی گئیں۔
بھارتی میڈیا کے مطابق 35 سالہ اداکارہ رنجوشہ مینن نے پھانسی لگا کر خودکشی کرلی، اداکارہ کی لاش آج صبح ان کے فلیٹ میں پنکھے سے لٹکی ہوئی ملی۔
رپورٹ میں بتایا گیا کہ وہ اپنے شوہر منوج کے ساتھ فلیٹ میں رہ رہی تھیں جو ایک اداکار بھی ہیں اور یہ بھی کہا جاتا ہے کہ اداکارہ موت کے وقت مالی مسائل کا شکار تھیں۔
پولیس نے واقعے کی تحقیقات شروع کردی ہیں جب کہ اداکارہ کی لاش کو پوسٹ مارٹم کے لیے بعد میں لے جایا جائے گا۔
اس افسوسناک خبر نے اداکارہ کے مداحوں کو چونکا دیا ہے اور وہ ان کی سوشل میڈیا پوسٹس پر کمنٹس کر کے اپنے دکھ کا اظہار کر رہے ہیں۔
گزشتہ ماہ بھی ملیالم اداکارہ اپرنا نائر نے خودکشی کی تھی، اداکارہ کی لاش ان کے کمرے میں پنکھے سے لٹکی ہوئی ملی تھی۔
واضح رہے کہ اداکارہ رنجوشہ مینن کئی ملیالم ٹیلی ویژن ڈراموں اور فلموں میں اپنے معاون کرداروں کے لیے جانی جاتی ہیں، انہوں نے ٹی وی سیریلز میں نظر آنے سے قبل بطور ٹی وی شو اینکر اپنے کیریئر کا آغاز کیا۔
