کویت اردو نیوز : سائنسدانوں نے جلد کی ایسی کریم تیار کی ہے جو سورج سے ہونے والے نقصان کو ریورس کرتی ہے اور جھریوں کا باعث بننے والے عمل کو روکتی ہے۔
محققین کے مطابق یہ نئی جنریشن کی سن کریم ہے جو نہ صرف سن برن سے بچاتی ہے بلکہ سورج کی شعاعوں سے جلد کو ہونے والے معمولی نقصان کو بھی فوری طور پر ٹھیک کرتی ہے۔
اس کریم میں میلانین نامی قدرتی مالیکیول کا مصنوعی ورژن ہوتا ہے۔ جلد میں موجود یہ مالیکیول سورج کی شعاعوں سے ہونے والے نقصان کی تلافی کرتے ہیں۔
جلد کی کریموں میں استعمال ہونے والا یہ مالیکیول نقصان دہ عوامل کو پکڑتا ہے اور ان کے اثرات کو ریورس کرتا ہے۔ یہ مالیکیول سورج سے نکلنے والی الٹرا وائلٹ شعاعوں سے متحرک ہوتے ہیں۔ یہ شعاعیں کولیجن کو نقصان پہنچاتی ہیں جو جلد کو صحت مند رکھتی ہے۔
کریم کا طویل المدت استعمال کئی سالوں سے دھوپ میں رہنے کی وجہ سے چہرے اور جلد پر پڑنے والی باریک لکیروں اور جھریوں سے بچانے کی صلاحیت رکھتا ہے۔
امریکا کی نارتھ ویسٹرن یونیورسٹی سے تعلق رکھنے والے ماہر امراض جلد ڈاکٹر کرٹ لو کے مطابق بہت سے لوگ سن برن کے بعد جلن کو کم کرنے کے لیے کریموں کا استعمال کرتے ہیں لیکن اس سےپہلےسورج سےجلدکوپہنچنےوالے نقصانات کو پورا کرنے کیلیے کچھ نہیں تھا۔
انہوں نے کہا کہ اس نقصان کو مسلسل پورا کرنے کی ضرورت ہے کیونکہ اگر آپ ہر روز اپنے چہرے کو ڈھانپے بغیر سورج کے سامنے آتے ہیں تو آپ کو مسلسل الٹرا وائلٹ روشنی کی کم سطح کا سامنا کرنا پڑتا ہے۔
