کویت اردو نیوز : بھارتی شہر پونے میں قتل کی کوشش کا انوکھا واقعہ پیش آیا ہے جہاں ایک شخص نے اپنی بیوی کو کیلشیم کےکیپسول میں بلیڈ کے ٹکڑے ڈال کر کھلا دئیے۔
45 سالہ سومناتھ سادھو نے بیوی کو مارنے کے لیے بلیڈ کے ٹکڑے کیپسول کے اندر ڈالے اور اسے کھلا دیا۔ خاتون کو ہسپتال منتقل کیا گیا جہاں ڈاکٹرز سرجری کے بعد اس کی جان بچانے میں کامیاب ہو گئے۔
اتم نگر پولیس نے جمعرات کو بتایا کہ ملزم پیشہ سے حجام ہے اور اسے قتل کے ایک معاملے میں گرفتار کیا گیا ہے۔
انسپکٹر کرن بالواڈکر نے میڈیا کو بتایا کہ ‘تحقیقات سے پتہ چلتا ہے کہ شوہر اور بیوی کے درمیان گھریلو ناچاقی چل رہی تھی اور حال ہی میں دونوں کے درمیان جھگڑے ہوئے تھے۔’ کچھ دن قبل بیوی کے پیٹ میں درد شروع ہوا اور طبی ٹیسٹ کے بعد اسے معلوم ہوا کہ درد اس وجہ سے تھا کہ اس کے پیٹ میں بلیڈ کے ٹکڑے تھے، جنہیں ڈاکٹروں نے سرجری کے ذریعے نکالا۔
پولیس کے مطابق مزید تفتیش سے معلوم ہوا کہ سومناتھ سادھو نے کیلشیم کیپسول کے اندر بلیڈ کے ٹکڑے ڈالے اور اپنی بیوی کو کھلائے۔
پولیس نے مزید کہا کہ تفتیش کے دوران یہ بھی پتہ چلا ہے کہ سومناتھ سادھو نے اکتوبر میں اپنی بیوی کو پانچ بار ایسے کیپسول کھلائے تھے۔
ملزم کے خلاف قتل، گھریلو تشدد ، خواتین پر ظلم کی دفعات کے تحت مقدمہ درج کر لیا گیا ہے۔