کویت اردو نیوز : مشہور بھارتی ڈرامے ‘سی آئی ڈی’ کے معروف اداکار کو دل کا دورہ پڑ گیا، انہیں وینٹی لیٹر پر منتقل کر دیا گیا۔
مقبول ترین بھارتی کرائم ڈرامہ سیریل سی آئی ڈی میں فریڈرکس کا مرکزی کردار ادا کرنے والے اداکار دنیش فڈنس کو دل کا دورہ پڑا جس کے بعد ان کی حالت تشویشناک بتائی جاتی ہے۔
بھارتی میڈیا رپورٹس کے مطابق 57 سالہ دنیش فڈنس کو اچانک دل کا دورہ پڑا جس کے بعد انہیں ممبئی کے اسپتال منتقل کردیا گیا۔
دنیش فڈنس اب وینٹی لیٹر پر ہیں جہاں وہ دل کا دورہ پڑنے کے بعد زندگی اور موت کی جنگ لڑ رہے ہیں، اداکار کی حالت جمعہ کی شب تشویشناک تھی تاہم اب ان کی حالت پہلے سے بہتر بتائی جا رہی ہے۔
بھارتی ٹی وی چینلز پر دو دہائیوں سے جاری ڈرامہ سی آئی ڈی کے عملے اور کاسٹ کو بھی فوری طور پر دنیش کی صحت سے متعلق آگاہ کیا گیا جس کے بعد ٹیم اداکار کی عیادت کے لیے اسپتال پہنچ گئی۔
اداکار کی صحت کے حوالے سے اس خبر نے ان کے مداحوں کو شدید تشویش میں مبتلا کر دیا ہے اور سوشل میڈیا پر دنیش کی صحت یابی کے لیے دعائیں کی جا رہی ہیں۔
واضح رہے کہ دنیش فڈنس نے سی آئی ڈی سے شہرت حاصل کی، اس کے علاوہ وہ کامیڈی ڈرامہ تارک مہتا کا الٹا چشمہ میں بھی مختصر کردار میں نظر آ چکے ہیں۔
CID پہلی بار 1998 میں نشر ہوا، جس نے اسے ہندوستان میں سب سے طویل چلنے والے ٹیلی ویژن شوز میں سے ایک بنا دیا۔
