کویت اردو نیوز : نادرا نے سوشل میڈیا پر وائرل ویڈیوز میں مذکور مختلف ایس ایم ایس سروسز کے حوالے سے بیان جاری کرتے ہوئے خبردار کیا ہے کہ نادرا صرف تین اقسام کی ایس ایم ایس سروس فراہم کررہا ہے۔
سوشل میڈیا پر وائرل ہونے والی ویڈیوز میں بتایا گیا کہ نادرا نے عوام کی سہولت کے لیے کچھ مخصوص ایس ایم ایس کوڈز جاری کیے ہیں جن پر میسج کرکے مطلوبہ معلومات حاصل کی جاسکتی ہیں۔
ویڈیوز میں بتایا گیا ہے کہ ان کوڈز کے ذریعے آپ جان سکتے ہیں کہ آپ فائلر ہیں یا نان فائلر، آپ کا نام ووٹنگ لسٹ میں ہے یا نہیں، آپ کی گاڑی کس کے نام پر ہے، آپ کا شجرہ نصب کون سا ہے وغیرہ وغیرہ۔
ویڈیوز میں کہا گیا کہ تمام معلومات گھر بیٹھے صرف ایس ایم ایس کر کے حاصل کی جا سکتی ہیں۔ جن بیگموں کو ٹھوس وجوہات کی بنا پر اپنے شوہروں پر شک ہے وہ بھی گھر بیٹھ کر چیک کر سکتی ہیں کہ ان کے شوہر نے دوسری شادی تو نہیں کر لی۔
آپ ویڈیوز میں مذکور مخصوص کوڈز کی تفصیلات اور وہ ذیل میں فراہم کردہ معلومات دیکھ سکتے ہیں۔
اپنی کار کا چیسس نمبر 8521 پر ایس ایم ایس کریں، آپ کو معلوم ہو جائے گا کہ آیا آپ کی کار چوری کی تونہیں ہے۔
اپنا شناختی کارڈ نمبر 7000 پر ایس ایم ایس کریں، آپ کو معلوم ہو جائے گا کہ آپ کے نام پر کوئی جعلی کارڈ نہیں بنایا گیا۔
اپنا شناختی کارڈ 8300 پر ایس ایم ایس کریں، اس سے آپ کو پتہ چل جائے گا کہ آیا آپ کا نام ووٹر لسٹ میں ہے اور اگر ہے تو کہاں۔
اپنا شناختی کارڈ نمبر 668 پر ایس ایم ایس کرکے آپ جان سکتے ہیں کہ آپ کے شناختی کارڈ پر کس نیٹ ورک کی کتنی سمیں ہیں۔
اپنے شناختی کارڈ نمبر سے پہلے "ATL” لکھیں، اس کے بعد اسپیس دیں اور 9966 پر ایس ایم ایس کریں، آپ کو معلوم ہو جائے گا کہ آپ فائلر ہیں یا نان فائلر۔
شناختی کارڈ نمبر 8009 پر ایس ایم ایس کریں، آپ کو معلوم ہو جائے گا کہ آپ کا شجرہ نصب کیا ہے۔
شناختی کارڈ 1166 پر ایس ایم ایس کرکے یہ بھی معلوم کیا جا سکتا ہے کہ آیا کورونا کی ویکسین لگائی گئی ہے یا نہیں۔
آپ 8500 پر شناختی کارڈ نمبر بھیج کر اپنا ہیلتھ کارڈ چیک کر سکتے ہیں۔
صحت کی سہولت کارڈ کے بارے میں دریافت کرنے کے لیے 9780 ڈائل کریں۔ اور احساس رجسٹریشن کے لیے اپنا شناختی کارڈ نمبر 8171 پر بھیجیں۔
شوہر کی دوسری شادی کا پتہ لگانے کے لیے اپنے موبائل فون سے شوہر کا شناختی کارڈ نمبر لکھ کر 8009 پر بھیج دیں تو تمام معلومات سامنے آجائیں گی کہ شوہر کی کتنی بیویاں اور کتنےبچےہیں۔
تاہم اب نادرا نے ان ویڈیوز کے حوالے سے ایک بیان جاری کیا ہے جس میں کہا گیا ہے کہ ‘انٹرنیٹ پر گردش کرنے والی مختلف ویڈیوز کے ذریعے نادرا کی ایس ایم ایس سروسز کے بارے میں غلط معلومات پھیلائی جا رہی ہیں جو کہ ایک غیر اخلاقی فعل ہے۔ اور غیر ذمہ دارانہ صحافت کی عکاسی کرتا ہے۔
بیان میں کہا گیا ہے کہ اس وقت نادرا کی تین ایس ایم ایس سروسز کام کر رہی ہیں جن کے ذریعے شہریوں کو درج ذیل سہولیات فراہم کی جا رہی ہیں۔
ان خدمات کے حوالے سے نادرا نے کہا کہ 8009 موبائل ٹیگنگ سروس ہے۔ شہری اپنا شناختی کارڈ نمبر متعلقہ موبائل نمبر سے 8009 پر ایس ایم ایس کر کے اپنا موبائل فون نمبر اپنے شناختی کارڈ پر درج کر سکتے ہیں۔
بیان کے مطابق ‘1166 شہری اس سروس کے ذریعے اپنے ویکسین کے ریکارڈ کی تصدیق کر سکتے ہیں’۔
بیان میں کہا گیا ہے کہ ‘8300 الیکشن کمیشن کے تعاون سے کام کرنے والی نادرا کی اس سروس کی بدولت شہری 8300 پر اپنا شناختی کارڈ بھیج کر اپنے ووٹر رجسٹریشن کی تفصیلات حاصل کر سکتے ہیں۔
بیان میں مزید کہا گیا کہ ‘اس کے علاوہ نادرا کی کوئی ایس ایم ایس سروس کام نہیں کر رہی ہے۔ شہریوں سے گزارش ہے کہ ایسی جھوٹی خبروں پر یقین نہ کریں اور نادرا کی خدمات اور سہولیات کے بارے میں معلومات کے لیے نادرا ہیلپ لائن 051-111786100 پر رابطہ کریں۔
