دل کی بیماریوں سے بچاؤ کے لیے ناشتے اور رات کے کھانے کے اوقات کتنے اہم ہیں

کویت اردو نیوز : کیا آپ جانتےہیں کہ دل کی بیماریوں سے بچاؤ کے لیے ناشتے اور رات کے کھانے کے اوقات کتنے اہم ہیں ؟

دل کی بیماری ایک اصطلاح ہے جو دل کی صحت سے متعلق مسائل کو بیان کرنے کے لیے استعمال ہوتی ہے، بشمول دل کا دورہ، دل کی بے قاعدگی یا عضو کے مختلف حصوں کو کسی بھی قسم کا نقصان۔

اب یہ بات سامنے آئی ہے کہ ناشتے اور رات کے کھانے کے اوقات دل کی بیماری میں اہم کردار ادا کرتے ہیں۔

نیچر کمیونیکیشنز جریدے میں شائع ہونے والی ایک تحقیق میں بتایا گیا ہے کہ رات کو دیر سے کھانا کھانے یا ناشتہ چھوڑنے سے دل کی بیماری کا خطرہ بڑھ جاتا ہے۔

تحقیق سے پتہ چلتا ہے کہ کھانے کے اوقات جسم کی گھڑی کے افعال کو متاثر کرتے ہیں، جس سے کارڈیو میٹابولک افعال میں ردوبدل ہوتا ہے جیسے کہ بلڈ پریشر ریگولیشن۔

اس تحقیق میں ایک لاکھ سے زائد افراد کے ڈیٹا کا جائزہ لیا گیا۔

محققین نے عمر، جنس، خاندانی تاریخ، نیند کا دورانیہ اور غذائی عادات جیسے مختلف عوامل کو دیکھا۔

نتائج سے معلوم ہوا کہ ناشتہ نہ کرنے سے دل کی بیماری کا خطرہ 6 فیصد تک بڑھ جاتا ہے۔

درحقیقت تحقیق کے مطابق اگر کوئی شخص دیر سے ناشتہ کرتا ہے، جیسے کہ صبح 8 بجے کے بجائے صبح 9 بجے، دل کی بیماری میں مبتلا ہونے کا خطرہ 6 فیصد تک بڑھ جاتا ہے۔

اسی طرح اگر رات کا کھانا رات 9 بجے کے بعد کھایا جائے تو اس سے دل کے امراض جیسے فالج کا خطرہ 28 فیصد تک بڑھ جاتا ہے۔

تحقیق سے ثابت ہوا ہے کہ رات اور صبح کے درمیان خالی پیٹ کا دورانیہ جتنا زیادہ ہوگا یا رات کے کھانے اور ناشتے کے درمیان کا فاصلہ جتنا زیادہ ہوگا دل کی بیماری کا خطرہ اتنا ہی کم ہوگا۔

محققین اب نتائج کی تصدیق کے لیے مزید تحقیق کرنے کی منصوبہ بندی کر رہے ہیں۔

انہوں نے کہا کہ جتنی جلدی ناشتہ اور رات کا کھانا کھا لیا جائے دل کی صحت کے لیے اتنا ہی بہتر ہے۔