کویت اردو نیوز : سعودی وزارت تجارت نے کہا ہے کہ سعودی عرب کے نام پر غیر ملکیوں کے کاروبار کی جانچ کے لیے یکم نومبر سے 30 نومبر تک مملکت کے مختلف شہروں میں 5,268 تحقیقات کی گئیں۔
عاجل ویب کے مطابق، سعودی وزارت تجارت نے X اکاؤنٹ پر کہا کہ کسی غیر ملکی کے لیے مملکت میں سعودی کے نام پر کاروبار کرنا ممنوع ہے۔
وزارت تجارت نے کہا کہ تحقیقات کا مقصد کاروباری سرگرمیوں کی جانچ کرنا اور سعودی نام سے کاروبار کو روکنا ہے۔ اس سلسلے میں ریٹیل، ریسٹورنٹس، کار ورکشاپس،سیلون، جنرل کنٹریکٹ کمپنیوں اور اسی طرح کے دیگر پبلک سروس سینٹرز میں چھان بین کی گئی۔
وزارت تجارت کا کہنا ہے کہ اس دوران مشکوک کیسز بھی سامنے آئے۔ ان کے خلاف قانونی کارروائی مکمل کر لی گئی جس کے مطابق غیر قانونی تاجروں کے تجارتی ادارے اور دکانیں سیل کر کے ان کی کمرشل رجسٹریشن منسوخ کر دی گئی، ساتھ ہی زکوٰۃ اور ٹیکس کی وصولی بھی شروع کر دی گئی۔ اس کے علاوہ دیگر سزائیں بھی دی گئی ہیں۔
سعودی قانون کے مطابق جو غیر ملکی سعودی کے نام پر کاروبار کرتا ہے یا سعودی کے نام پر کسی غیر ملکی کو کاروباری سہولیات فراہم کرتا ہے اسے پانچ سال تک قید اور پچاس لاکھ ریال جرمانہ یا دونوں سزائیں ہو سکتی ہیں۔
اس کے علاوہ غیر قانونی کاروبار کرنے اور کرانے والوں پر جرمانہ عائد کیا جاتا ہے اور جرم ثابت ہونے پر غیر ملکیوں کو ملک بدر اور بلیک لسٹ کر دیا جاتا ہے۔
