کویت اردو نیوز : واٹس ایپ میں 2023 کے دوران کئی نئے فیچرز متعارف کرائے گئے۔
اب میٹا کی ملکیت والی میسجنگ ایپ نے ایک منفرد فیچر شامل کیا ہے جو ویڈیو کالنگ کے تجربے کو بدل دے گا کچھ عرصہ قبل واٹس ایپ نے ویڈیو کالز کے دوران اسکرین شیئرنگ کا فیچر متعارف کرایا تھا۔
اب میسجنگ ایپ اس میں بہتری لا رہی ہے اور ویڈیو کالز کے دوران آڈیو شیئر کرنا ممکن ہو سکے گا۔
WaBetaInfo کی ایک رپورٹ کے مطابق اینڈرائیڈ ڈیوائسز کے لیے واٹس ایپ کے بیٹا ورژن میں ویڈیو کالز کے دوران آڈیو شیئر کرنے کا فیچر متعارف کرایا گیا ہے۔
اس فیچر کے تحت ویڈیو کال کے دوران فون میں کسی بھی آڈیو فائل کو چلانا ممکن ہوگا۔
اس فیچر کے ذریعے صارفین اپنے پسندیدہ گانے ایک ساتھ سن سکتے ہیں، دفتری کام ایک ساتھ کر سکتے ہیں اور دیگر کئی مقاصد کے لیے استعمال کیا جا سکتا ہے۔
رپورٹ کے مطابق جب کوئی صارف ویڈیو کال کے دوران اسکرین شیئر کرے گا تو فون سے آڈیو بھی منتقل ہو جائے گی۔
اس فیچر سے واٹس ایپ روایتی ویڈیو کانفرنسنگ ایپس جیسے مائیکروسافٹ ٹیمز، گوگل میٹ، زوم اور فیس ٹائم کا مقابلہ کر سکے گا۔
اسکرین شیئرنگ فیچر گوگل میٹ اور زوم جیسی ایپس میں اسی طرح کام کرتا ہے۔
واضح رہے کہ واٹس ایپ میں ویڈیو کالنگ کا فیچر نومبر 2016 میں متعارف کرایا گیا تھا تاہم اس میں بتدریج بہتری لائی گئی۔
کچھ عرصہ قبل واٹس ایپ نے iOS صارفین کے لیے ویڈیو کالز میں پکچر ان پکچر سپورٹ متعارف کرایا تھا۔
اسی طرح مختصر ویڈیو پیغامات کا فیچر بھی میسجنگ پلیٹ فارم میں جولائی میں شامل کیا گیا تھا۔
آڈیو شیئرنگ فیچر فی الحال بیٹا میں ہے اس لیے یہ کہنا مشکل ہے کہ تمام صارفین اسے کب استعمال کر سکیں گے۔
