کویت اردو نیوز 09 نومبر: محکمہ ٹریفک کی جانب سے جدید کیمرے نصب کرنے کا فیصلہ کر لیا گیا ہے۔
روزنامہ الانباء کی رپورٹ کے مطابق وزارت داخلہ نے ملک میں پہلی بار کار پلیٹوں کی نشاندہی کرنے اور کار کا رنگ ریکارڈ کرنے کیلئے نئے ٹریفک کیمروں کی تنصیب کا فیصلہ کیا ہے۔کویت کی جانب سے ابھرتے ہوئے کورونا وائرس اور سڑکوں پر ٹریفک کی نقل و حرکت کا مقابلہ کرنے کے لئے جدید کیمروں کی تنصیب کی جائے گی۔
ذرائع نے بتایا کہ یہ کیمرے چند منٹوں میں سیکڑوں پلیٹیں پڑھ سکتے ہیں اور پلیٹ نمبر اور کار کا رنگ بھی اسٹور کرسکتے ہیں۔پھر ڈیٹا بیس میں جغرافیائی محل وقوع ، تاریخ اور وقت کے ساتھ تمام ڈیٹا محفوظ کرسکتے ہیں تاکہ کسی حادثے یا مشکل کے وقت اس ڈیٹا تک رسائی ممکن ہو سکے۔
ذرائع نے اشارہ کیا کہ یہ کیمرے ٹریفک لائٹس یا روڈ سائن پر نصب کیے جاسکتے ہیں۔ ایک طرف کیمرے خلاف ورزیوں کی نگرانی کرینگے اور دوسری طرف بیک وقت کاروں کی نقل و حرکت پر نظر رکھنے میں مدد کریں گے۔
ذرائع نے بتایا کہ وزارت داخلہ نے ان کیمروں کو لانے کے معاہدے پر دستخط کرنے کی منظوری حاصل کرلی ہے۔ معاہدے کی مالیت 788،700 دینار ہے۔ مزید یہ کہ معاہدہ پر عمل درآمد کرنے والی کمپنی ضرورت کے وقت وزارت داخلہ کے نیٹ ورک پر (4G) خدمات فراہم کرے گی۔