سوشل میڈیا سائٹس کا استعمال ذہنی تناؤ اور اداسی کا سبب

کویت اردو نیوز : سوشل میڈیا سائٹس کو اب دنیا بھر میں اربوں لوگ استعمال کرتے ہیں اور اب اس کا ایک بڑا نقصان سامنے آیا ہے۔

جرمنی کی Ruhr University Bochum کی ایک تحقیق میں بتایا گیا ہے کہ سوشل میڈیا سائٹس کا استعمال لوگوں کو ذہنی تناؤ اور زندگی سے ناخوش ہونے کا سبب بن سکتا ہے۔

اس تحقیق میں ایک آن لائن سروے میں 1230 افراد کو شامل کیا گیا۔ ان افراد نے ہفتے میں کم از کم ایک بار سوشل میڈیا سائٹ کا استعمال کیا۔

ان افراد سے 6 مختلف سوالنامے پُر کرنے کو کہا گیا اور پوچھا گیا کہ وہ کس حد تک مادہ پرستانہ رویہ رکھتے ہیں اور وہ اپنا موازنہ دوسروں سے کیسے کرتے ہیں۔

نتائج سے معلوم ہوا کہ مادیت پسندانہ ذہنیت کے حامل لوگ سوشل میڈیا سائٹس پر اپنا موازنہ دوسروں سے کرتے ہیں۔ تحقیق سے معلوم ہوا کہ مادیت پرستی اور سوشل میڈیا کا بے مقصد استعمال بھی انہیں سوشل میڈیا کی لت کا شکار بنا دیتا ہے۔

تحقیق کے مطابق جب لوگ اپنا موازنہ دوسروں سے کرتے ہیں تو انہیں ذہنی تناؤ جیسے مختلف مسائل کا سامنا کرنا پڑتا ہے۔ تناؤ سے متاثرہ افراد کی زندگی کا اطمینان کم ہوتا ہے۔

محققین نے کہا کہ نتائج بتاتے ہیں کہ سوشل میڈیا سائٹس کا استعمال اعلیٰ مادیت پسند ذہنیت کے حامل افراد کے لیے نقصان دہ ہو سکتا ہے۔

انہوں نے کہا کہ یہ زیادہ پریشان کن ہے کیونکہ سوشل میڈیا کے نتیجے میں ان لوگوں کی مادہ پرستانہ سوچ بڑھ سکتی ہے۔ انہوں نے کہا کہ بہتر ہے کہ سوشل میڈیا پر گزارے جانے والے وقت کو بتدریج کم کیا جائے۔

ان کا مزید کہنا تھا کہ ضروری نہیں کہ سوشل میڈیا کا استعمال مکمل طور پر ترک کر دیا جائے کیونکہ اس سے دماغی صحت بھی متاثر ہو سکتی ہے۔