کویت اردو نیوز : واٹس ایپ ایک مکمل منفرد فیچر متعارف کرانے پر کام کر رہا ہے۔ اگر آپ نے اینڈرائیڈ فونز میں Near by Share نامی فیچر استعمال کیا ہے تو آپ کو واٹس ایپ کا نیا فیچر ضرور پسند آئیگا۔
WABetaInfo کی ایک رپورٹ کے مطابق واٹس ایپ کا یہ نیا فیچر قریبی لوگوں کے ساتھ فائلز شیئر کرنا بہت آسان بنا دے گا۔
رپورٹ میں بتایا گیا کہ فائل شیئرنگ کا یہ نیا فیچر فی الحال اینڈرائیڈ ڈیوائسز کے لیے واٹس ایپ کے بیٹا ورژن میں دستیاب ہے۔ یہ فیچر صرف اسی وقت کام کرے گا جب دوسرے لوگوں کی جانب سے شیئر کی درخواست منظور کی جائے گی۔
اس فیچر کے تحت فائلز کو صرف ان لوگوں کے ساتھ شیئر کرنا ممکن ہوگا جو صارف کی کانٹیکٹ لسٹ میں موجود ہوں گے۔ اسی طرح فائل شیئرنگ فیچر جیسے واٹس ایپ میسجز اور کالز کو بھی اینڈ ٹو اینڈ انکرپشن کے ذریعے محفوظ کیا جائے گا۔
یعنی یہ اینڈرائیڈ کے نیئر بائی فیچر جیسا ہی ہوگا لیکن اینڈ ٹو اینڈ انکرپشن کے اضافی تحفظ کے ساتھ جو آپ کے فون کو ان لوگوں کے دیکھنے سے روک دے گا جو آپ کی کانٹیکٹ لسٹ میں نہیں ہیں۔
یہ نیا فیچر عوامی مقامات پر کسی کے ساتھ تصاویر یا ویڈیوز شیئر کرنے کے لیے کارآمد ہوگا۔
رپورٹ میں کہا گیا ہے کہ فی الحال یہ فیچر بیٹا میں آزمایا جا رہا ہے اس لیے یہ کہنا مشکل ہے کہ یہ کب سب کے لیے متعارف کرایا جائے گا۔
خیال رہے کہ گزشتہ دنوں واٹس ایپ چینلز کو بہتر بنانے کیلیے متعدد فیچرز متعارف کرائےگئے تھے۔ میٹا کی ملکیت والی ایپ چینلز کی ملکیت کسی دوسرےشخص کو منتقل کرنے کیلیے ایک فیچر پر بھی کام کر رہی ہے۔
