کویت اردو نیوز 🙁 پاکستان ) ٹوبہ ٹیک سنگھ میں ٹک ٹاک ویڈیوز بنانے کے شوق نے نوجوان کی جان لے لی۔
ریسکیو حکام کے مطابق حادثہ اکال والا روڈ کے قریب پیش آیا جہاں گارڈن ٹاؤن کے رہائشی 18 سالہ احمد نے گزشتہ شام اپنے دوست سے ٹک ٹاک ویڈیو بنانے کا کہہ کر تالاب میں چھلانگ لگا دی تاہم وہ پانی کی گہرائی میں ڈوب گیا۔
اطلاع ملتے ہی ریسکیو ٹیم وہاں پہنچی اور آدھے گھنٹے بعد نوجوان کی لاش کو نکال کر اسپتال پہنچایا۔ ڈپٹی کمشنر محمد نعیم نے واقعے پر افسوس کا اظہار کرتے ہوئے کہا کہ نوجوان سوشل میڈیا کا استعمال احتیاط سے کریں۔
یاد رہے کہ اس سے قبل بھی ٹک ٹاک بناتے ہوئے ایک اور نوجوان جان کی بازی ہار گیا تھا ، ریسکیو 1122 کے مطابق چکلالہ نورانی محلہ گرگہ روڈ راولپنڈی کا رہائشی حمزہ بن نوید چکلالہ ریلوے سٹیشن کے قریب ٹک ٹاک بناتے ہوئے ٹرین کی زد میں آ گیاتھا۔
ریسکیو حکام کے مطابق حمزہ اپنے دوستوں کے ساتھ ریلوے لائن کے قریب ٹک ٹاک ویڈیو بنا رہا تھا کہ پیچھے سے آنے والی ٹرین کی زد میں آکر وہ زخمی ہو کر گر گیا۔
ریسکیو 1122 کے ترجمان نے بتایا کہ شاہ خالد کالونی میں ریلوے لائن پر ٹرین کی زد میں آکر ایک نوجوان کے بارے میں اطلاع ملی اور وہ پہلے ہی دم توڑ چکا تھا ، ریسکیو حکام کیمطابق 18 سالہ لڑکے کی لاش کو بے نظیر بھٹو اسپتال منتقل کردیا گیا۔
