کویت اردو نیوز : دبئی انٹرنیشنل ایئرپورٹ (DXB) سے سفر کرنے والا ایک شخص اپنے سامان میں سے کچھ عجیب و غریب چیزوں کے ساتھ پکڑا گیا: پکڑی جانے والی چیزوں میں ایک زندہ سانپ، ایک بندر کا ہاتھ، ایک مردہ پرندہ اور روئی میں لپٹے ہوئے انڈے شامل ہیں۔
عربی روزنامے امارات ال یوم میں شائع ہونے والی ایک رپورٹ کے مطابق، دبئی کسٹمز نے ان اشیاء کو اسمگل کرنے کی کوشش ناکام بنا دی جو کہ جادو ٹونے میں استعمال ہوتی ہیں ۔
انسپکٹرز نے مسافر کے سامان کو مشکوک پایا، اس لیے انہوں نے مکمل تلاشی لی اور پلاسٹک کے ڈبے کے اندر بند چونکا دینے والے ذخیرے کو بے نقاب کیا۔
سانپ، پرندے اور بندر کے ہاتھ کے علاوہ، حکام نے روئی میں لپٹے ہوئے انڈے، منتر، طلسم، اور کاغذی تراشوں پر مشتمل مختلف اوزار بھی قبضے میں لے لی ، ان سب کے بارے میں خیال کیا جاتا ہے کہ ان کا مقصد جادو ٹونے کی سرگرمیوں میں استعمال کرنا تھا۔
ضبط شدہ اشیاء کو مزید جانچ کے لیے دبئی میں محکمہ اسلامی امور اور خیراتی سرگرمیوں کے حوالے کر دیا گیا۔
پیسنجر آپریشن ڈیپارٹمنٹ میں ٹرمینل 1 کے سینئر مینیجر خالد احمد نے کہا کہ دبئی کسٹمز اپنی تمام شکلوں میں اسمگلنگ سے لڑنے کے لیے پرعزم ہے۔انہوں نے کہا کہ ٹیم چوکس رہے گی اور کمیونٹی کو نقصان سے بچانے کے لیے ہر ممکن کوشش کرے گی۔