کویت اردو نیوز : ایران اور اسرائیل کے درمیان کشیدگی اور تہران کے تل ابیب پر حملے نے خطے کے ممالک کی فضائی ٹریفک کو بھی متاثر کیا ہے۔
اس تناظر میں، کویت ایئرویز نے اعلان کیا کہ اس کی پروازوں کا شیڈول تمام مقامات پر معمول کے مطابق ہے۔ تاہم عراق، ایران، اردن ، لبنان کی سرحدوں پر پروازیں معطل کر دی گئی ہیں۔
ایران اور اسرائیل کے درمیان موجودہ کشیدگی کے بعد سعودی عرب کی متعدد فضائی کمپنیوں نے شمالی سرحد کے قریب ہوائی اڈوں کیلیے اپنی پروازیں معطل کر دی ہیں۔ ریاض سے اردن جانے والی پروازیں واپس کر دی گئیں، جبکہ قریات ایئرپورٹ جانے والی پروازیں منسوخ کر دی گئیں۔
دریں اثنا، اردنی حکام نے کہا ہے کہ انہوں نے شام 8 بجے سے اپنی فضائی حدود کو روانگی اور نقل و حمل کے لیے عارضی طور پر بند کر دیا ہے۔ وہ صورتحال پر نظر رکھیں گے اور مسافروں کو اپ ڈیٹ فراہم کریں گے۔
اردنی سول ایوی ایشن ریگولیٹری اتھارٹی نے وضاحت کی کہ یہ فیصلہ اردنی فضائی حدود میں شہری ہوابازی کی حفاظت کو برقرار رکھنے کے لیے کیا گیا ہے۔
یاد رہے کہ ایرانی پاسداران انقلاب نے اسرائیل کی جانب بڑی تعداد میں میزائل اور ڈرون داغنا شروع کر دیا ہے۔ کل رات گئے سے اسرائیل پر دو سو کے قریب ڈرون اور میزائل داغے جا چکے ہیں۔
