کویت اردو نیوز : ہر سال پاکستانیوں کی بڑی تعداد سیاحت کے مقصد سے ترکی کا رخ بھی کرتی ہے۔ تاریخی اور سیاحتی مقامات اور تفریح کے منفرد ذرائع دنیا بھر سے سیاحوں کو تیزی سے ترکی کی طرف راغب کر رہے ہیں۔
ترکی جانے کے لیے ویزا درکار ہے۔ پاکستان میں اناطولیہ ویزا ایپلیکیشن سینٹرز ترکی کے وزٹ ویزا کیلیے درخواستیں قبول کرتے ہیں۔ ترکی کے وزٹ ویزا کی درخواست کے ساتھ بینک اسٹیٹمنٹ، ہیلتھ انشورنس، ایئر ٹکٹ کی تفصیلات، تصویر، فنگر پرنٹس،ہوٹل ریزرویشن اور دیگر تفصیلات بھی جمع کرنا ضروری ہیں۔
اناطولیہ ویزا ایپلیکیشن سینٹر عام درخواست کے لیے USD 65 اور VIP درخواست کے لیے USD 80 کی سروس فیس لیتا ہے۔
پاکستان سے سفر کرنے والے پاکستانیوں اور غیر ملکیوں کو ایکسچینج ریٹ کے مطابق ویزا فیس پاکستانی کرنسی میں ادا کرنا ہوگی۔ ویزا فیس ناقابل واپسی ہے۔ ترکی میں ایک داخلے کے لیے سفارت خانے کی فیس USD 60 اور متعدد داخلوں کے لیے USD 190 ہے۔ 19 اپریل کے ایکسچینج ریٹ کے مطابق ایک امریکی ڈالر 280 پاکستانی روپے کے برابر ہے، اس لیے سنگل انٹری ویزا فیس 16 ہزار 800 روپے اور ملٹی پل انٹری فیس 53 ہزار 200 روپے ہے۔
صرف اناطولیہ ویزا درخواست مراکز سے دستیاب سفری ہیلتھ انشورنس قبول کی جائے گی۔ ٹریول ہیلتھ انشورنس کی میعاد بھی اس تاریخ سے شروع ہوگی جس تاریخ کو ویزا کی درخواست جمع کروائی گئی ہے۔
ترکی کا دورہ کرنے کے خواہشمند افراد کو ترکی کے سفارت خانے یا قونصل خانے کی ہدایات کے مطابق 3، 6 یا 12 ماہ کی بنیاد پر ترکی آنے والی ٹریول ہیلتھ انشورنس بھی حاصل کرنی چاہیے۔
تین ماہ کا سفری ہیلتھ انشورنس US$55، 6 ماہ کا سفری ہیلتھ انشورنس US$75 اور ایک سال کا سفری ہیلتھ انشورنس US$95 ہوگا۔
