کویت وزارت داخلہ نے نیا ویزا پورٹل لانچ کر دیا – تفصیلات جانیے

وزارت داخلہ کویت نے “کویت ویزا پورٹل” https://kuwaitvisa.moi.gov.kw کے نام سے ایک نیا آن لائن پلیٹ فارم لانچ کر دیا ہے۔ یہ سرکاری ویب سائٹ افراد کو مختلف اقسام کے ای ویزا (الیکٹرانک ویزا) کے لیے درخواست دینے، اپنی درخواست کی حیثیت چیک کرنے، ویزا کی معلومات کی تصدیق کرنے، اور دیگر امیگریشن سے متعلق خدمات حاصل کرنے کی سہولت فراہم کرتی ہے۔

یہ پلیٹ فارم نائب اول وزیر اعظم اور وزیر داخلہ شیخ فہد الیوسف کی ہدایات پر اور وزارت داخلہ کے قائم مقام انڈر سیکریٹری میجر جنرل علی العدوانی کی نگرانی میں تیار کیا گیا ہے۔ اس کا مقصد ویزا کے عمل کو تیز، شفاف اور آسان بنانا ہے تاکہ بیرون ملک سے آنے والے افراد کو سہولت فراہم کی جا سکے۔

نئی ویزا پورٹل کے ذریعے ایسے افراد کے لیے درخواستیں دی جا سکتی ہیں جو کویت کا قانونی طور پر سیاحتی، تجارتی، خاندانی یا سرکاری دورہ کرنا چاہتے ہیں۔ یہ تمام اقسام وزارت داخلہ کے قواعد و ضوابط اور جنرل ڈیپارٹمنٹ آف ریزیڈنسی افیئرز کی جانب سے جاری کردہ ہدایات کے مطابق ہوں گی۔

■ دستیاب ویزوں کی اقسام اور تفصیلات:

🔹 سیاحتی ویزا (Tourist Visa)
یہ ویزا ان افراد کے لیے ہے جو کویت میں سیر و تفریح یا چھٹیاں گزارنے کی غرض سے آنا چاہتے ہیں۔
اہل افراد: تمام عام شہری جو سیاحتی مقصد کے لیے آنا چاہتے ہیں
قیام کی مدت: آمد کی تاریخ سے لے کر تین ماہ تک

🔹 تجارتی ویزا (Commercial Visa)
یہ ویزا ان کاروباری افراد کے لیے ہے جو کویت میں بزنس میٹنگز، کانفرنسز یا مقامی کمپنیوں سے معاہدے کے لیے آنا چاہتے ہیں۔
اہل ادارے: مقامی کمپنیاں، کاروباری نمائندے، ہوٹل اور بڑے تجارتی ادارے
قیام کی مدت: آمد کی تاریخ سے ایک ماہ تک

🔹 فیملی وزٹ ویزا (Family Visit Visa)
یہ ویزا ان افراد کے لیے ہے جو کویت میں اپنے اہلِ خانہ سے ملنے کے لیے آنا چاہتے ہیں، جیسے شادی، عید یا دیگر تقریبات میں شرکت کے لیے۔
اہل افراد: صرف قریبی رشتہ دار، اور درخواست کویت میں مقیم خاندان کا فرد دے گا
قیام کی مدت: آمد کی تاریخ سے ایک ماہ تک

🔹 سرکاری ویزا (Government Visit Visa)
یہ ویزا اُن حکومتی افسران کے لیے مخصوص ہے جو کسی سرکاری کانفرنس، معاہدہ یا دوطرفہ اجلاس میں شرکت کے لیے کویت آنا چاہتے ہیں۔
اہل افراد: سرکاری ادارے
ضروریات: میزبان سرکاری ادارے کی باضابطہ دعوت نامہ، اور سفارتی اصولوں کی پابندی
قیام کی مدت: آمد کی تاریخ سے ایک ماہ تک

■ سیکیورٹی اور قانونی شرائط:

وزارت داخلہ نے واضح کیا ہے کہ تمام وزٹ ویزے سیکورٹی جانچ پڑتال کے تابع ہوں گے۔ ہر درخواست کے ساتھ تمام معاون دستاویزات فراہم کرنا لازمی ہوگا، چاہے درخواست دہندہ کوئی فرد ہو، کمپنی ہو یا سرکاری ادارہ۔

اہم نکات:

• ویزا کے لیے درخواست دینے سے پہلے پاسپورٹ کی معیاد کم از کم 6 ماہ باقی ہونا ضروری ہے۔

• ہر قومیت کے افراد آن لائن ویزا کے اہل نہیں ہوتے، اس لیے پہلے ویزا پالیسی ضرور چیک کریں۔

• درخواست پر کارروائی کا وقت ویزا کی قسم اور کاغذات کی تکمیل پر منحصر ہوگا۔

• سیاحتی ویزا کے لیے مخصوص دستاویزات لازمی ہوں گی۔

وزارت نے متنبہ کیا ہے کہ ویزا کی شرائط کی خلاف ورزی، جیسے مقررہ مدت سے زیادہ قیام یا ویزے کے مقصد کا غلط استعمال، سخت قانونی کارروائی کا باعث بنے گا