کویت اردو نیوز 28 جون: شامی شہری نے اپنی ماں کو قتل کر دیا جبکہ ایک کویتی پولیس اہلکار کو بھی چھری کے پے درپے وار کر کے شہید کر دیا۔
تفصیلات کے مطابق آج بروز پیر صبح سویرے ملک شام سے تعلق رکھنے والے ایک شہری نے ٹریفک خلاف ورزی کا ٹکٹ جاری کرنے کے دوران کویتی پولیس اہلکار عبدالعزیز الرشیدی پر چھری کے متعدد وار کر دئیے اور تب تک وار کرتا رہا جب تک کہ پولیس اہلکار شہید نہیں ہو گیا اور پولیس اہلکار کا ہتھیار لے کر اپنی گاڑی میں سوار ہو کر موقع واردات سے فرار ہوگیا۔ بعدازاں پولیس کو مزید پتہ چلا کہ مشتبہ شخص نے اپنی والدہ کو بھی القصور کے علاقے میں چھرا گھونپ کر قتل کیا ہے۔ سپیشل فورسز نے قاتل کو گرفتار کرنے کے لئے الوفرہ کے علاقے میں ایک فارم ہاؤس میں گھیر لیا۔ ہتھیار ڈالنے کے لئے فورسز نے اس کے ساتھ بات چیت کی لیکن
ملزم نے فورسز پر فائرنگ شروع کر دی۔ فورسز اور ملزم کے درمیان شدید فائرنگ کا تبادلہ ہوا جس کے نتیجے میں ملزم شدید زخمی ہو گیا۔ ملزم سے اسلحہ قبضے میں لے لیا گیا اور زخمی حالت میں العدان ہسپتال منتقل کیا گیا جہاں اس کی موت کی تصدیق کر دی گئی۔ روزنامہ الرای کو ایک سیکیورٹی ذرائع سے معلوم ہوا کہ موقع واردات سے حاصل ہونے والی تصاویر سے یہ بات واضح ہو گئی تھی کہ ملزم وہی شامی شہری ہے جس نے القصور کے علاقے میں اپنی والدہ کا بھی قتل کیا اور بعد میں مھبولا چلا گیا جہاں پولیس اہلکار نے ٹریفک کی خلاف ورزی کرنے پر جرمانہ کرنے کے لئے ملزم کو روکا
لیکن ملزم نے موقع پا کر پولیس اہلکار پر چھری کا وار کر دیا اور تب تک وار کرتا رہا جب تک کہ پولیس اہلکار شہید نہیں ہو گیا۔ پولیس اہلکار عبدالعزیز الرشیدی کی نماز جنازہ صلیبیحات قبرستان میں ادا کر دی گئی ہے جس میں سکیورٹی فورسز کے اعلی عہدیداروں کے علاوہ سپیکر قومی اسمبلی اور لوگوں کی بڑی تعداد نے شرکت کی۔مرحوم پولیس اہلکار 1992 میں پیدا ہوا تھا۔ اللہ رب العزت مرحوم کی مغفرت اور اہل خانہ کو صبر و جمیل عطاء فرمائے آمین