کویت اردو نیوز 13 جولائی: ملک میں جرائم کے بڑھتے ہوئے واقعات کے پیچھے 65 فیصد منشیات کا عمل دخل ہے: رپورٹ
روزنامہ القبس کی رپورٹ کے مطابق ذمہ دار ذرائع نے منشیات اور نفسیاتی زیادتی کے نتیجے میں ملک میں بڑھتے ہوئے تشدد اور جرائم کی شرح کے بارے میں خطرے کی گھنٹی بجا دی ہے۔ ذرائع نے انکشاف کیا ہے کہ کویت کے اندر ہونے والے 65 فیصد جرائم کا سبب زہریلے نشہ آور مواد کی فروخت اور استعمال ہے۔ ذرائع نے اس بات کی تصدیق کی ہے کہ بہت سارے ڈرگز پروموٹر سوشل میڈیا کے ذریعہ نئی نسل کو اپنی طرف راغب کررہے ہیں تاکہ وہ انھیں منشیات اور نشہ آور ادوایات کے جال میں پھنسا سکیں جو صحت کے
تباہ کن خطرات کا باعث بن رہی ہیں لہٰذا نوجوانوں اور نوعمروں میں نشے کی لت روکنے کے لئے فوری طور پر اقدامات کی ضرورت ہے۔ ذرائع کے مطابق ملک میں سیکیورٹی خدمات کے زیر غور ہر 50 معاملات میں سے 35 مقدمات منشیات سے متعلق ہوتے ہیں اور مجموعی طور پر 50 سے 60 فیصد قیدی منشیات کے معاملات میں سزا یافتہ ہیں۔
ذرائع نے اشارہ کیا کہ 2010 سے لے کر 2020 تک منشیات کے مقدمات کی کل تعداد 25 ہزار تھی جس میں تقریبا 19 ہزار مقدمات میں شہری ملوث تھے۔ منشیات کے معاملات میں مردوں کی شرح 93 فیصد ہے۔ عادی افراد کی تعداد کے بارے میں ذرائع نے انکشاف کیا ہے کہ کویت میں 40،000 سے زائد منشیات کے عادی افراد ہیں اگرچہ وزارت صحت میں رجسٹرڈ تعداد بہت کم ہے لیکن منشیات کے بارے میں سرکاری اعدادوشمار سے پتہ چلتا ہے کہ یہ نوعمروں اور نوجوانوں میں پھیل رہا ہے۔
ذرائع نے تصدیق کی کہ کویت کو "مافیا اور منشیات فروشوں کی طرف سے ایک حقیقی جنگ کا نشانہ بنایا جارہا ہے جو پوری کوشش کر رہے ہیں کہ وہ اسے منشیات کی منتقلی کا ایک ٹرانزٹ اسٹیشن بنائیں۔” انہوں نے بتایا کہ "متاثرہ نوجوان کے جرائم کی شرح میں منشیات کی وجہ سے اضافہ ہوا ہے۔
ذرائع نے نشاندہی کی کہ منشیات کے استعمال کی شرح میں اضافے اور ضبط شدہ مقدار کی دو اہم وجوہات ہیں:
- پہلی یہ کہ نئی قسم کی نشہ آور دوائیں آرہی ہیں جو سستی اور نقل و حمل میں آسان ہوچکی ہیں اور منشیات فروش اور پروموٹرز ان کو فروخت کرنے کے لئے سوشل میڈیا کا استحصال کرنے میں کامیاب رہے ہیں۔
- دوسرا کویت کا جغرافیائی محل وقوع ہے جو منشیات برآمد کرنے والے بڑے ممالک ایران اور افغانستان جیسے بڑے تقسیم اور پیداوار مراکز کے قریب ہے۔
ذرائع نے زور دے کر کہا کہ سیکیورٹی خدمات متعلقہ حکام کے ساتھ ہم آہنگی سے منشیات ، نفسیاتی مادے اور الکوحل کے تمام جرائم کی نگرانی کے لئے کوشاں ہیں اور ضروری تحقیقات اور تفتیش کررہی ہے اور ان سے متعلق تمام معلومات و شواہد اکھٹے کئے جارہے ہیں تاکہ ان جرائم کا پتہ لگایا جاسکے اور مجرموں کا سراغ لگائیں اور انہیں گرفتار کیا جاسکے۔
