کویت اردو نیوز 01 اپریل: کویت کے نائب وزیر اعظم اور وزیر داخلہ شیخ احمد النواف نے تصدیق کی ہے کہ جب تک فائر فائٹنگ فورس آگ لگنے کی وجوہات کی تحقیقات مکمل نہیں کر لیتی پبلک سیکیورٹی مبارکیہ مارکیٹ میں آگ لگنے والے حصے کو دو دن کے لیے بند رکھا جائے گا تاکہ
تباہ شدہ دکانوں اور اس کے اطراف کے مالکان کی املاک کو محفوظ بنایا جا سکے۔ انہوں نے اس بات کی نشاندہی کرتے ہوئے کہا کہ فائر فائٹرز کی کوششوں کی بدولت آگ پر قابو پالیا گیا۔ آتشزدگی کے مقام پر اپنی موجودگی کے دوران وزیر نے بتایا کہ وہ جانتے ہیں کہ شہری اور مکین رمضان کے بابرکت مہینے میں مبارکیہ آنا پسند کرتے ہیں اور انشاءاللہ ہم انہیں اس خوشی سے محروم نہیں کریں گے اور ہم جنرل فائر فورس اور وزارت داخلہ میں طریقہ کار مکمل کرنے کے بعد دو دن کے اندر اس جگہ کو مکمل طور پر بحال کر دیں گے۔ انہوں نے عوام کی تعریف کرتے ہوئے کہا کہ
پٹرولنگ اور فائر فائٹنگ کرنے والی گاڑیوں کی آواز سننے پر ان کو راستہ دینا اور ان کو جلد از جلد جائے حادثہ تک پہنچنے میں مدد دینا آگاہی اور ان کے کام کی اہمیت کو سمجھنے کا ثبوت ہے۔ النواف نے فائر بریگیڈ اور وزارت داخلہ کے ملازمین کا بھی شکریہ ادا کیا جنہوں نے
جائے حادثہ کو محفوظ بنانے اور ہجوم (جو اس حادثے کی فلم بندی کرنے کے خواہشمند تھے) کو دور رکھنے کی کوششیں کیں لیکن وہ نہیں جانتے کہ ان دکانوں کی چھتیں کمزور تھیں جو اس کے نیچے سے گزرتے ہی ان پر گر سکتی تھیں۔ انہوں نے سب کے لیے سلامتی کی خواہش کے ساتھ ساتھ کویت اور اس میں بسنے والے لوگوں کو ہر طرح کے نقصان سے محفوظ رکھنے کی دعا کی۔
