کویت اردو نیوز : جدید دور میں اسمارٹ فون کے بغیر رہنا بہت مشکل لگتا ہے حتیٰ کہ اس کا استعمال نوجوانوں میں ایک نشہ بن چکا ہے لیکن ایک بھارتی خاتون نے اس مسئلے کا انوکھا حل نکال لیا ہے۔
بھارتی میڈیا کے مطابق منجو گپتا نامی بھارتی خاتون نے اپنے شوہر اور بچوں کو اسمارٹ فون کی لت سے نجات دلانے کا معاہدہ تیار کیا جس پر انہوں نے دستخط بھی کردیئے۔ خاتون کا کہنا تھا کہ ان کے گھر والے ایک دوسرے سے زیادہ ان کے موبائل فون سے قریب ہو گئے تھے۔
منجو گپتا کے معاہدے پر دستخط کرنے کا مقصد اسمارٹ فونز کے متوازن استعمال اور خاندان کے ساتھ وقت گزارنے کی عادت کو فروغ دینا ہے۔
یہ معاہدہ، جو ہندی میں ایک کاغذ پر لکھا گیا ہے، تین اصول بیان کرتا ہے جو درج ذیل ہیں:
1) جب گھر والے صبح اٹھیں تو اپنے فون کے بجائے سورج کی طرف دیکھیں۔
2) کھانے کی میز پر سب کو اکٹھے کھانا چاہیے اور اس دوران کسی کے پاس موبائل فون نہیں ہونا چاہیے۔
3) کوئی بھی اسمارٹ فونز کو باتھ روم تک نہیں لےجائےگا تاکہ وہاں بیٹھ کر وقت ضائع کیاجاسکے۔
معاہدے میں یہ بھی کہا گیا ہے کہ فیصلہ غصے میں نہیں لیا گیا۔ اور سزا میں یہ شرط رکھی گئی ہے کہ اگر کوئی ضابطے کی خلاف ورزی کرے گا تو اس پر ایک ماہ کے لیے آن لائن کھانا آرڈر کرنے پر پابندی ہوگی۔
