کویت اردو نیوز 12 جولائی: امیر کویت نے صدر پاکستان ڈاکٹر عارف علوی کی پاکستان آمد کی دعوت قبول کرلی۔
تفصیلات کے مطابق دفتر صدر پاکستان نے پیر کو ایک بیان میں کہا کہ کویت کے امیر شیخ نواف الاحمد الجابر الصباح نے صدر پاکستان ڈاکٹر عارف علوی کی پاکستان آمد کی دعوت قبول کرلی ہے تاہم ابھی اس سفر کی تفصیلات کو حتمی شکل دینے کے بارے میں نہیں بتایا گیا ہے۔ صدر پاکستان نے کہا کہ امیر کویت نے ایک خط لکھا ہے جس میں "پاکستان اور کویت کے مابین مضبوط تعلقات پر اطمینان کا اظہار کیا گیا ہے اور باہمی مفاد کے لئے تمام شعبوں میں
تعلقات کو مزید وسعت دینے کے عزم کا اعادہ کیا ہے۔” امیر کویت شیخ نواف الاحمد الجابر الصباح کے خط میں رواں سال مئی میں کویت کا پاکستانیوں پر سفری پابندی ختم کرنے کے فیصلے کی پیروی کی گئی ہے۔ یاد رہے کہ کویت نے 2011 میں ایران ، عراق ، شام ، پاکستان اور افغانستان کے شہریوں کے ویزے معطل کردیئے تھے۔
2020 میں پاکستان نے کویت کے ساتھ ویزا دوبارہ شروع کرنے کی بات چیت کا آغاز کیا جس کے بعد سیکڑوں نرسیں ، ڈاکٹر اور طبی ٹیکنیشن خلیجی ریاست کا سفر کرنے میں کامیاب ہوئے۔ مئی میں کویت کے وزیر اعظم شیخ صباح الخالد الصباح سے ملاقات کے بعد پاکستان کے وزیر داخلہ شیخ رشید احمد نے کہا کہ پاکستانی شہریوں کے کاروبار اور فیملی ویزا کو "فوری طور پر” دوبارہ شروع کیا جائے گا۔
پچھلے ماہ ترکی میں انٹالیا ڈپلومیسی فورم کے موقع پر کویتی وزیر خارجہ شیخ احمد ناصر المحمد الصباح کی اپنے ہم منصب پاکستان کے وزیر خارجہ شاہ محمود قریشی سے ملاقات کے دوران پاکستانی وزیر خارجہ نے کویت کی سفری پابندیوں میں نرمی کا خیرمقدم کیا۔ خلیجی تعاون کونسل (جی سی سی) کے ایک اہم ملک کویت کے ساتھ پاکستان کو دیرینہ برادرانہ تعلقات حاصل ہیں۔
