کویت اردو نیوز ، 31 اکتوبر 2023: شارجہ میں السیوہ کے علاقے میں منگل کو صبح کے وقت ایک ولا میں لگنے والی آگ نے ایک 63 سالہ اماراتی شخص کی جان لے لی اور اس کی 12 سالہ بیٹی شدید زخمی ہوگئی ہے ۔
اس دوران خاندان کے افراد اور گھریلو ملازمہ سمیت نو افراد کو بحفاظت بچا لیا گیا۔
پولیس آپریشن روم کو واقعے کی اطلاع دینے والی کال موصول ہوئی۔ ایمرجنسی عملہ اور فائر فائٹرز نے فوری طور پر جائے حادثہ پر پہنچ کر آگ پر قابو پالیا۔ شارجہ سول ڈیفنس کا کہنا تھا کہ فائر فائٹرز نے آگ پر قابو پالیا اور اسے گھر کے دیگر حصوں تک پھیلنے سے روک دیا۔
آگ لگنے کی وجہ جاننے کے لیے تحقیقات جاری ہیں۔ پولیس کے فرانزک ماہرین یہ جاننے کے لیے کام کر رہے ہیں کہ آگ کس وجہ سے لگی؟
