چیف آف ڈیفنس فورسز اور آرمی چیف فیلڈ مارشل عاصم منیر کو سعودی عرب کی جانب سے اعلیٰ ترین ریاستی اعزاز کنگ عبدالعزیز میڈل سے نواز دیا گیا ہے۔ یہ اعزاز ان کی شاندار عسکری خدمات، مؤثر قیادت اور پاک۔سعودی دفاعی تعاون کو نئی بلندیوں تک پہنچانے میں کلیدی کردار کے اعتراف میں دیا گیا۔
پاک فوج کے شعبہ تعلقات عامہ آئی ایس پی آر کے مطابق کنگ عبدالعزیز میڈل سعودی عرب کا سب سے بڑا سول و عسکری اعزاز ہے، جو غیر معمولی خدمات انجام دینے والی شخصیات کو عطا کیا جاتا ہے۔ یہ اعزاز فیلڈ مارشل عاصم منیر کی اسٹریٹجک بصیرت، دفاعی ہم آہنگی اور دونوں ممالک کے درمیان ادارہ جاتی روابط کے فروغ میں ان کے اہم کردار کا مظہر ہے۔
آئی ایس پی آر کے مطابق یہ اعزاز علاقائی امن و استحکام کے قیام، انسدادِ دہشت گردی میں مؤثر تعاون، اور خطے میں سلامتی کے چیلنجز سے نمٹنے کے لیے مشترکہ کاوشوں کی بھی عکاسی کرتا ہے۔ فیلڈ مارشل عاصم منیر نے پاک۔سعودی دفاعی تعاون کو مضبوط بنانے میں عملی اقدامات کیے، جن کے مثبت اثرات دوطرفہ عسکری تعلقات پر نمایاں طور پر دیکھے جا رہے ہیں۔
بیان میں کہا گیا ہے کہ سعودی قیادت نے فیلڈ مارشل عاصم منیر کی پیشہ ورانہ صلاحیتوں، مضبوط فیصلہ سازی اور اسٹریٹجک وژن کو سراہا۔ سعودی حکام نے دونوں برادر ممالک کے دیرینہ تعلقات کو مزید مستحکم بنانے کے لیے ان کے پختہ عزم کی تعریف بھی کی۔
اعزاز وصول کرنے کے موقع پر فیلڈ مارشل عاصم منیر نے خادم الحرمین الشریفین اور سعودی قیادت کا شکریہ ادا کرتے ہوئے کہا کہ یہ اعزاز پاکستان اور سعودی عرب کے درمیان مضبوط، قابلِ اعتماد اور پائیدار تعلقات کی علامت ہے۔ انہوں نے اس اعزاز کو پاکستان کی مسلح افواج اور عوام کے لیے اعزاز قرار دیا۔
آئی ایس پی آر کے مطابق فیلڈ مارشل عاصم منیر نے مملکتِ سعودی عرب کی سلامتی، استحکام اور خوشحالی کے لیے پاکستان کے غیر متزلزل عزم کا اعادہ کیا اور کہا کہ پاکستان ہر سطح پر سعودی عرب کے ساتھ تعاون جاری رکھے گا۔
پاک فوج کے شعبہ تعلقات عامہ کا کہنا ہے کہ کنگ عبدالعزیز میڈل دونوں ممالک کے گہرے برادرانہ تعلقات، مشترکہ اسٹریٹجک مفادات اور خطے میں امن و سلامتی کے لیے مشترکہ وژن کی واضح عکاسی کرتا ہے، جو مستقبل میں پاک۔سعودی شراکت داری کو مزید مضبوط بنانے کا باعث بنے گا۔
