کویت اردو نیوز 21 مئی: انسانی ہمدردی کے تحت رہائشی قوانین (اقامہ) کی خلاف ورزی کرنے والوں کو ایک بار پھر مہلت دی جائے گی۔
تفصیلات کے مطابق کویت کے وزیر داخلہ نے ملک میں رہائشی قوانین (اقامہ) کی خلاف ورزی کرنے والوں کو ایک بار پھر انسانی ہمدردی کے تحت ایک نئی مہلت دینے کا اعلان کردیا ہے۔ وزیر داخلہ شیخ ثامر العلی الصباح نے روزنامہ الرای کو بیان دیتے ہوئے موجودہ صورتِحال کے پیش نظر وزارت داخلہ کے رہائشی قوانین کی خلاف ورزی کرنے والے غیر ملکیوں کے لئے نئی مہلت دینے سے متعلق فیصلے سے آگاہ کیا۔ وزیر داخلہ شیخ ثامر العلی الصباح نے اعلان کیا کہ کویتی اقامہ / رہائشی قانون کی خلاف ورزی کرنے والوں کو بہت جلد انسانی ہمدردی کے تحت آخری ڈیڈلائن دی جائے گی تاکہ وہ ملک میں اپنی قانونی حیثیت میں ترمیم کرسکیں۔
واضح رہے کہ 15 اپریل 2021 کو وزیر داخلہ نے اقامہ خلاف ورزی کرنے والوں کی حیثیت میں ترمیم کی مدت میں 15 اپریل 2021 سے 15 مئی 2021 تک توسیع کرنے کا فیصلہ جاری کیا تھا لیکن انہوں نے روزنامہ الرای کو ایک خصوصی بیان میں واضح کیا کہ "صحت کے بحران ، انسانی ہمدردی کے نقطہ نظر اور بیشتر ہوائی اڈوں کی بندش کے سبب رہائشی قانون کی خلاف ورزی کرنے والوں کے لئے جرمانے کی ادائیگی اور ملک میں اپنی حیثیت کو باضابطہ طور پر تبدیل کرنے کےلئے ایک نئی ڈیڈ لائن دی جائے گی۔
وزیر داخلہ شیخ ثامر العلی الصباح نے غیرقانونی طور پر رہائش پذیر افراد سے اس مدت سے فائدہ اٹھانے کا مطالبہ کیا تاکہ وہ اپنے اقامہ میں ترمیم کے بعد قانونی طور پر کویت میں رہائش پذیر ہوں اور کسی بھی قسم کی قانونی کارروائی و جرمانوں سے خود کو محفوظ بنا سکیں۔
