کویت اردو نیوز 16 مئی: کویت میں خوفناک حادثے کے نتیجے میں ایک پاکستانی اور ایک بھارتی شہری موقع پر جاں بحق جبکہ دو کو تشویشناک حالت میں ہسپتال پہنچا دیا گیا۔
تفصیلات کے مطابق کویت کے ہائی وے روڈ 6.5 رنگ روڈ پر فور وہیل ڈرائیو گاڑی ایک لیمپ پوسٹ سے ٹکرا گئی جس میں 4 پاکستانی اور ایک بھارتی شہری سوار تھے۔ حادثے کے نتیجے میں ایک پاکستانی اور ایک بھارتی شہری (جس کا تعلق کشمیر سے تھا) کی موت واقع ہو گئی جبکہ دیگر تین کو فائر فائٹرز، سیکورٹی اور طبی ایمرجنسی اہلکاروں نے فوری ہسپتال پہنچایا۔ اگلی سیٹ پر بیٹھے دو افراد موقع پر ہی دم توڑ گئے جبکہ پچھلی سیٹ پر بیٹھے ہوئے تین افراد کو تشویشناک حالت میں ہسپتال لے جایا گیا جن میں سے ایک کو طبی سہولیات دینے کے بعد آج ہسپتال سے فارغ کر دیا گیا جبکہ باقی دو کا علاج چل رہا ہے۔ ابتدائی تفتیش میں حادثے کی وجہ
معلوم نہیں ہوسکی ہے اس کے کئی امکانات ہو سکتے ہیں کیونکہ اس قسم کے حادثے پہلے بھی ہو چکے ہیں جس میں گاڑی کا ٹائر پھٹنا، تیز رفتاری یا گاڑی کے انحراف کے نتیجے میں بھی ایسا حادثہ رونما ہو سکتا ہے تاہم مزید تحقیقات جاری ہیں۔
