کویت اردو نیوز 23 جون: کویت میں معروف پاکستانی ریسٹورنٹ کی جانب سے پاکستانی کرکٹ ٹیم کے اعزاز میں پرتکلف عشائیہ کا اہتمام کیا گیا۔
تفصیلات کے مطابق کویت کے گنجان آباد علاقے سالمیہ میں واقع معروف پاکستانی ریسٹورنٹ "دسترخوان” کی جانب سے 06 ملکی ٹی 20 کرکٹ ٹورنامنٹ جیتنے کی خوشی میں پاکستانی کرکٹ کے لئے پرتکلف عشائیہ کا اہتمام کیا گیا جس میں ٹیم کے کپتان کاشف اور دیگر پلئیرز احسان، سعد، امین، خالد، عدنان، عثمان، شاہ رخ اور ہارون کے علاوہ پاکستان کرکٹ ٹیم کی آفیشل مینجمنٹ سے کوچ طارق شاہ، مینیجر و ترجمان حسنین اور سرپرست اعلی احسان نے بھی شرکت کی۔ ٹیم اور مینجمنٹ کی پرتکلف کھانوں سے تواضع کی گئی۔ کویت اردو نیوز سے بات چیت کرتے ہوئے ٹیم کے کوچ طارق شاہ نے کہا کہ
"اس ٹورنامنٹ کو کامیاب کرانے میں کویت کرکٹ بورڈ کی کوششیں جبکہ ٹورنامنٹ کی اس جیت کو حاصل کرنے کے لئے پاکستان کرکٹ ٹیم اور اس کی مینجمنٹ کی انتھک محنت ہے، 06 ملکی ٹی 20 کرکٹ ٹورنامنٹ کا انعقاد ہر سال کیا جاتا ہے تاہم عالمی وباء کورونا کے باعث پچھلے چند سالوں سے اس کا انعقاد نہیں کیا گیا تھا لیکن اللہ کا شکر ہے کہ
اب صورتحال قدرے بہتر ہے اور اس طرح کے ایونٹس کا دوبارہ آغاز کیا گیا ہے جس سے کھلاڑیوں کی پرفارمنس کے ساتھ خود اعتمادی میں اضافہ ہوتا ہے”۔ ریسٹورنٹ کے مالک ذاکر رضوی نے تمام پلئیرز اور مینجمنٹ کو مبارکباد پیش کرتے ہوئے کہا کہ ” یہ ہمارے لیے بہت خوشی کی بات ہے کہ 06 ملکی کرکٹ ٹورنامنٹ میں پاکستانی ٹیم نے جیت حاصل کی،
ویڈیو کی آواز میں دشواری کی صورت میں ہماری ویب سائٹ www.kuwaitnewsurdu.com پر وزٹ کریں
ہمارے تمام پلئیرز نے بہت عمدہ کھیل کا مظاہرہ کیا اور ایک بڑے مارجن سے حریف ٹیم کو شکست دی اسی لئے پلئیرز اور تمام مینجمنٹ کی حوصلہ افزائی اور ان کا شکریہ ادا کرنے کے لیے عشائیہ کا اہتمام کیا گیا، ہماری دعائیں اور نیک تمنائیں پاکستانی ٹیم کے ساتھ ہیں”۔
دوسری جانب پاکستانی ٹیم کے مینیجر و ترجمان حسنین نے کہا کہ ” ہم پاکستانی ٹیم اور مینجمنٹ کی جانب سے "دسترخوان” مینجمنٹ کا شکریہ ادا کرتے ہیں جنہوں نے ہماری حوصلہ افزائی کے لئے ہمیں یہاں مدعو کیا، پوری ٹیم اس حوصلہ افزائی کو بہت سراہتی ہیں اور پاکستانی ٹیم آئندہ بھی دیارِ غیر میں اپنے ملک کا نام روشن کرنے لئے اسی طرح محنت کرتی رہے گی”۔
یاد رہے کہ چند روز قبل کویت کرکٹ آفیشل کلب کی جانب سے کویت میں 06 ملکی ٹی 20 کرکٹ ٹورنامنٹ کا انعقاد کیا گیا جس میں کویت، پاکستان، بھارت، بنگلہ دیش، سری لنکا اور افغانستان کی ٹیموں نے حصہ لیا۔ پاکستانی ٹیم پورے ٹورنامنٹ میں ناقبل شکست رہتے ہوئے فائنل تک پہنچی اور اپنی حریف ٹیم بھارت کو فائنل مقابلے میں شکست سے دوچار کیا اور سال 2022 کی چیمپئن ٹیم قرار پائی، پاکستان نے پہلے بیٹنگ کرتے ہوئے 20 اوورز میں 208 رنز بنائے جبکہ اس کے مقابلے میں بھارتی ٹیم 20 اوورز میں 9 وکٹوں کے نقصان پر صرف 135 رنز ہی بنا سکی۔