کویت اردو نیوز، 23 اپریل: بحرین کا ایک نوجوان گزشتہ روز صبح کے وقت اپنی گاڑی چلاتے ہوئے دل کا دورہ پڑنے سے جاں بحق ہوگیا، یہ حادثہ شاہ فیصل اسٹریٹ پر پیش آیا۔
ابتدائی تفصیلات سے پتہ چلتا ہے کہ ایک نوجوان کل صبح چھ بجے شاہ فیصل سٹریٹ پر اپنی کار چلا رہا تھا کہ اچانک اس کی حرکت قلب بند ہو گئی جس کے باعث اسکی گاڑی ٹریفک لائٹ اور لوہے کی باڑ سے ٹکرا گئی اور وہ اس حادثے میں جاں بحق ہو گیا جبکہ کار کو جزوی نقصان پہنچا تھا.
حادثے کے فوری بعد پولیس موقع پر پہنچ گئی، ٹریفک پولیس کے پہنچنے تک گاڑیوں کو سہولت فراہم کی گئی، جائے حادثہ سے لاش کو ہٹا کر گاڑی کو سڑک سے ہٹایا گیا، جس کے بعد سرکاری حکام نے تحقیقات کا آغاز کیا۔
دوسری جانب وزارت داخلہ نے سماجی رابطوں کی ویب سائٹ ٹوئٹر پر کہا کہ ایک شخص اپنی گاڑی چلاتے ہوئے اچانک حرکت قلب بند ہونے سے جاں بحق ہوگیا، جس کے باعث شاہ فیصل اسٹریٹ پر مضافاتی علاقے الصیف کی جانب ٹریفک حادثہ پیش آیا۔
