کویت اردو نیوز ، 20 اکتوبر 2023: سعودی عرب میں عام اشیاء پر اللہ کا نام اور سونے کے زیورات پر قرآن پاک کی آیات لکھنے پر پابندی عائد کردی گئی۔
سعودی میڈیا کے مطابق وزارت داخلہ کی جانب سے ایک ہدایت جاری کی گئی ہے کہ کاغذ، برتن یا دیگر اشیاء پر اللہ کا نام نہ لکھا جائے جو استعمال کے بعد پھینک دی جائیں۔
بیان میں کہا گیا کہ اس طرح اللہ کے مبارک نام کی بے حرمتی کی جاتی ہے۔ لہٰذا ایسی اشیاء تیار کرنے والی کمپنیاں ہوشیار رہیں ورنہ ایسی اشیاء ضبط کر لی جائیں گی۔
سعودی وزارت داخلہ کے بیان میں یہ بھی کہا گیا ہے کہ سونے کے زیورات اور دیگر آرائشی اشیاء پر قرآنی آیات نہ لکھی جائیں۔ قرآنی آیات صرف ہدایت کے لیے ہیں۔ آرائشی استعمال کے لیے درست نہیں ہے۔
وزارت داخلہ نے کہا کہ ان ہدایات کے لیے ریاست کے مفتی اعظم نے ایک خط لکھا تھا جس میں کہا گیا تھا کہ تعویذ کے لیے قرآنی آیات زیورات میں لکھی جا سکتی ہیں جو کہ اسلام میں ممنوع ہے۔
سعودی مفتی نے اپنے خط میں یہ بھی لکھا ہے کہ قرآنی آیات والے زیور پہن کر لوگ بیت الخلا میں داخل ہوتے ہیں جس سے بے حرمتی کا خدشہ ہے۔