کویت اردو نیوز : بھارتی شہر حیدرآباد سے ایک چونکا دینے والی ویڈیو سامنے آئی ہے جس میں مقامی ریسٹورنٹ سے منگوائی گئی بریانی میں ایک مردہ چھپکلی نظر آ رہی ہے۔
اس ویڈیو کو وشوا آدتیہ نامی صارف نے سوشل میڈیا پر پوسٹ کیا جس نے سوشل میڈیا پر ایک نئی بحث چھیڑ دی۔ ایک منٹ طویل ویڈیو میں دکھایا گیا ہے کہ ایک چھپکلی پلیٹ میں بے جان پڑی ہے، جسے وشوا کھانے ہی والی تھی۔
گاہک نے یہ بریانی ‘Zomato’ نامی ڈیلیوری کمپنی کے ذریعے منگوائی۔
کلپ میں دکھایا گیا ہے کہ صارف چاول کی ایک پلیٹ پکڑے ہوئے ہے جس میں ایک چھپکلی چکن بریانی کے درمیان پڑی ہے۔
آدتیہ نے زوماٹو کے ساتھ ہونے والی گفتگو کے اسکرین شاٹس بھی شیئر کیے جس سے ظاہر ہوتا ہے کہ بریانی ‘باورچی بریانی’ نامی ریستوراں سے منگوائی گئی تھی۔
ریسٹورنٹ کے باورچی بریانی کو سوشل میڈیا صارفین کی جانب سے شدید تنقید کا نشانہ بنایا جا رہا ہے اور غیر ذمہ داری کا مظاہرہ کرنے پر ان سے جواب طلب کیا جا رہا ہے۔
کچھ صارفین نے اس خبر پر اپنے صدمے کا اظہار کرتے ہوئے میمز بھی شیئر کیں، جب کہ دیگر یہ جاننا چاہتے تھے کہ ریسٹورنٹ کے خلاف کوئی کارروائی کیوں نہیں کی گئی۔
وائرل ٹویٹ کا جواب دیتے ہوئے، ڈیلیوری پلیٹ فارم زوماٹو نے کہا کہ ‘ہم نے مسئلے کی نشاندہی کی ہے اور کسٹمر سے بات کی ہے، ہم اسے بہت سنجیدگی سے لیتے ہیں اور اس پر کام کر رہے ہیں’۔
