کویت اردو نیوز : میٹا نے فیس بک میسنجر کے لیے 2023 کا سب سے بڑا فیچر متعارف کرا دیا ہے۔ میٹا کی ملکیت والے واٹس ایپ کے بعد فیس بک میسنجر نے بھی میسج ایڈٹ فیچر کا اضافہ کیا ہے۔
اب تک میسنجر میں غلط ٹائپ کیے گئے میسج کو ان سینڈ یا ڈیلیٹ کرنا پڑتا تھا۔ لیکن اب آپ کو غلطی سے کسی پیغام کو ڈیلیٹ کرنے کی ضرورت نہیں ہے، اس کے بجائے آپ اسے ایڈٹ کر سکتے ہیں۔
واٹس ایپ کا بہترین فیچر بالآخر فیس بک میسنجر کا حصہ بن گیا ہے۔
یہ فیچر صارفین کے لیے موبائل ایپس کے ساتھ ساتھ فیس بک کے ڈیسک ٹاپ ورژن میں بھی دستیاب ہے۔
اس فیچر کے ذریعے صارفین بھیجے گئے پیغام کو 15 منٹ میں ایڈٹ کر سکتے ہیں۔ تاہم، ایسے پیغام کے اوپر ایک ترمیم کا لیبل نظر آئے گا، جس سے یہ واضح ہو جائے گا کہ پیغام میں ترمیم کی گئی ہے۔
یہ فیچر استعمال کرنا بہت آسان ہے۔فیس بک میسنجر پر میسج بھیجنے کے بعد موبائل ایپ پر اس میسج پر کلک کریں۔ ایسا کرنے کے بعد ایک ایڈٹ آپشن آئے گا جسے میسج کو درست کرنے کے لیے استعمال کیا جا سکتا ہے۔
ڈیسک ٹاپ ورژن میں، پیغام کے بائیں جانب تین نقطوں والے مینو پر کلک کریں اور وہاں ترمیم کا بٹن منتخب کریں۔
بھیجے گئے پیغام کو 15 منٹ کے اندر ایڈٹ کرنا ہوگا، اس کے بعد یہ ممکن نہیں ہوگا۔
واضح رہے کہ اس سے قبل میٹا نے گزشتہ دنوں میسنجر میں اینڈ ٹو اینڈ انکرپشن کا فیچر بطور ڈیفالٹ متعارف کرایا تھا۔
اینڈ ٹو اینڈ انکرپشن کے ساتھ، صرف بھیجنے والا اور وصول کنندہ ہی پیغامات اور کالز دیکھ سکتا ہے، اور میٹا کو اس ڈیٹا تک رسائی حاصل نہیں ہوگی۔
