کویت اردو نیوز : کیا آپ جانتے ہیں کہ دنیا بھر میں پاسپورٹ صرف 4 رنگوں میں بنتے ہیں؟آپ کا پاسپورٹ نیلے، سرخ، سبز اور سیاہ رنگوں میں سے ایک رنگ کا ہوگا۔
دلچسپ بات یہ ہے کہ اس سلسلے میں کوئی باقاعدہ اصول نہیں ہیں جو مخصوص رنگوں کے استعمال کےلیے مجبور کرتے ہیں۔
انٹرنیشنل سول ایوی ایشن آرگنائزیشن (ICAO)، وہ ادارہ جو ہوائی سفر کے لیے معیارات طے کرتا ہے، سفری دستاویزات جیسے پاسپورٹ کے لیے ممالک کو مخصوص ٹائپ فیس، ٹائپ سائز اور فونٹس تجویز کرتا ہے۔
پاسپورٹ کی تیاری کے لیے ضروری ہے کہ ایسے مواد کا استعمال کیا جائے جو سلوٹوں کو روکے۔
اسی طرح مواد کو مختلف درجہ حرارت جیسے کہ 14 سے 122 ڈگری فارن ہائیٹ پر پڑھنے کے قابل ہونا چاہیے جبکہ ہوا میں نمی 5 سے 95 فیصد تک کم نہ ہو۔
لیکن ICAO نے کبھی بھی پاسپورٹ کور کے لیے مخصوص رنگوں کا استعمال لازمی نہیں کیا۔
آئی سی اے او کے چیف کمیونیکیشن آفیسر انتھونی فلبن کے مطابق پاسپورٹ کے رنگوں کا انتخاب حادثاتی نہیں تھا۔
اس کی وجہ یہ ہے کہ گہرے رنگ نہ صرف زیادہ آفیشل محسوس ہوتے ہیں بلکہ دھول اور ٹوٹ پھوٹ کو بھی چھپاتے ہیں اور یہی ان کے انتخاب کی بنیادی وجہ ہے یعنی وقت گزرنے کے باوجود پاسپورٹ گندا یا بوسیدہ نظر نہیں آنا چاہیے۔
عام طور پر پاسپورٹ کے رنگ کا انتخاب جغرافیائی، سیاسی اور مذہبی بنیادوں پر کیا جاتا ہے، جیسے کہ مسلم ممالک اکثر سبز کو ترجیح دیتے ہیں، یورپ میں سرخ رنگ عام ہے، امریکی ممالک میں نیلے رنگ کے مختلف شیڈز استعمال کیے جاتے ہیں، جب کہ کالا رنگ بہت کم ممالک استعمال کرتے ہیں۔
