کویت اردو نیوز : برسوں پہلے ہالی ووڈ کی ایک فلم ’سنیکس آن اے پلین‘ کافی مقبول ہوئی تھی۔ ایسا ہی ایک واقعہ تھائی لینڈ کی ایک پرواز میں پیش آیا جب پرواز کے دوران مسافروں کے قریب سانپ نکل آیا۔
میڈیا رپورٹس کے مطابق سوشل میڈیا پر ایک ویڈیو وائرل ہو رہی ہے جس میں مسافروں کے سروں پر بنے ڈبے پر سانپ کو رینگتے دکھایا گیا ہے۔
یہ واقعہ تھائی ایئرایشیا کی بنکاک سے فوکٹ جانے والی پرواز میں پیش آیا۔ دوران پرواز جب ایک مسافر نے اسے دیکھا تو فلائٹ اٹینڈنٹ نے فوری ایکشن لیتے ہوئے سانپ کو پکڑنے کی کوشش کی۔
ویڈیو میں دیکھا جا سکتا ہے کہ عملہ شروع میں سانپ کو پلاسٹک کی بوتل میں ڈالنے کی کوشش کرتا ہے لیکن آخر کار بوتل کا استعمال کرتے ہوئے سانپ کو پلاسٹک کے تھیلے میں ڈال دیتا ہے۔
ایئر ایشیا تھائی لینڈ کے کارپوریٹ سیفٹی کے سربراہ فول پومپوانگ نے واقعے کی تصدیق کرتے ہوئے کہا کہ یہ واقعہ فلائٹ FD3015 میں پیش آیا جو بنکاک کے ڈان مویانگ انٹرنیشنل ایئرپورٹ سے روانہ ہوئی تھی۔
چیف نے اپنے بیان میں کہا کہ فلائٹ فوکٹ میں اترنے سے پہلے ایک مسافر نے فلائٹ اٹینڈنٹ کو بتایا کہ سامان کے ہولڈ میں سانپ ہے۔
انہوں نے کہا کہ ایئر ایشیا کا عملہ اس قسم کی صورتحال سے نمٹنے کے لیے اچھی طرح سے تربیت یافتہ ہے، انہوں نے مزید کہا کہ فلائٹ اٹینڈنٹ نے سانپ کو پکڑنے سے پہلے احتیاط کے طور پر مسافروں کو دوسری طرف منتقل کیا ۔
