کویت اردو نیوز : ایک انوکھی گاڑی جو زمین پر چلتی ہے اور ہوا میں اڑتی ہے، گویا کسی سائنس فکشن فلم سے نکل کر ہماری دنیا میں آگئی ہے۔
کمپنی کو توقع ہے کہ 2025 تک یہ گاڑی لوگوں کو سڑک پر سفر کرنے کے ساتھ ساتھ ہوا میں اڑنے کے قابل بنائے گی۔
ماڈل اے نامی یہ کار جب صارفین کے لیے دستیاب ہوگی تو اس کی قیمت $3لاکھ مقرر کی جائے گی۔
امریکی کمپنی الفا ایروناٹکس کی دو سیٹوں والی فلائنگ کار ابھی تک صارفین کے لیے دستیاب نہیں ہے لیکن لوگ پہلے ہی اس کے 2,850 یونٹ محفوظ کر چکے ہیں۔
اس گاڑی کے اندر آٹھ پروپیلرز لگائے گئے تھے اور کمپنی کے مطابق یہ اڑنے والی گاڑی دنیا بھر میں ٹریفک کا مسئلہ حل کرسکتی ہے۔
کمپنی نے کار کی تیاری اور تحقیق کے لیے 2023 میں یو ایس فیڈرل ایوی ایشن اتھارٹی سے خصوصی سرٹیفکیٹ حاصل کیا تھا، لیکن اسے ابھی بھی آزمائشی پرواز کے لیے اجازت درکار ہے۔
یہ الیکٹرک کار سڑک پر 25 سے 35 میل فی گھنٹہ اور ہوا میں 110 میل فی گھنٹہ کی رفتار سے سفر کر سکے گی۔
یہ گاڑی ہیلی کاپٹر کی طرح ٹیک آف اور لینڈ کر سکے گی اور اس کی خاص بات یہ ہے کہ اس میں پرواز میں مدد کرنے کے لیے پر نہیں ہیں۔
چونکہ اس کے پر نہیں ہیں اس لیے یہ ڈرون کی طرح پروپیلرز کی مدد سے اڑنے کے قابل ہوگی۔
