کویت اردو نیوز 01 اگست: یکم اگست سے کویت جانے کے لیے مکمل ٹریول گائیڈ سور طریقہ کار درج ذیل ہیں۔
تفصیلات کے مطابق ڈائریکٹریٹ جنرل برائے سول ایوی ایشن DGCA نے 29 جولائی کو کویت کی نئی سفری پالیسی کی وضاحت کرتے ہوئے ایک سرکلر جاری کیا۔ یہ سرکلر یکم اگست سے نافذ العمل ہے اور اس کے عمل میں آتے ہی کویت کے تمام سابقہ سفری سرکلر منسوخ کردیئے گئے ہیں۔ سرکلر کے مطابق مندرجہ ذیل مسافروں کو کویت جانے والی پروازوں میں سوار ہونے کی اجازت نہیں ہوگی۔
کویت جانے والی پرواز میں کوویڈ 19 کی علامات ظاہر کرنے والے مسافروں (زیادہ درجہ حرارت، سردی، کھانسی، چھینک وغیرہ) کو قبول نہیں کیا جائے گا۔
وہ افراد جو 31 اگست 2019 کو یا اس سے پہلے کویت سے بیرونِ ملک سفر کرگئے تھے انہیں کویت کی ریاست میں داخل ہونے کی اجازت نہیں ہے چاہے ان کے پاس جائز رہائشی اقامہ ہی کیوں نہ ہو۔
سرکلر میں یہ بھی نوٹ کیا گیا ہے کہ کویت انٹرنیشنل ایئرپورٹ پر ویزا آن ارائیول کی سہولت دستیاب نہیں ہے۔ KWI میں ٹرمینل سے ٹرمینل ٹرانزٹ کی بھی اجازت نہیں ہے۔ صرف KU سے KU (ٹرمینل 4 کے اندر) کی اجازت ہے۔ ٹرانزٹ مسافروں کے لیے کوئی اضافی ضروریات یا طریقہ کار نہیں ہے۔
وہ افراد جو 01 ستمبر 2019 کو کویت کی ریاست سے باہر سفر کرگئے ہیں انہیں کویت میں داخل ہونے کی اجازت ہے بشرطیکہ ان کے پاس جائز رہائشی اجازت نامہ (ویزا) ہو۔
مسافروں کو واضح ہدایات جاری کی گئی ہیں کہ IMMUNE یا Kuwait Mobile ID ایپلی کیشن کے اسکرین شاٹس، پرنٹ آؤٹ، تصاویر کو قبول نہیں کیا جائے گا۔ مسافروں کو اسمارٹ فون سے ایپلی کیشن کے ذریعے ہی اس کی تصدیق کروانی ہوگی۔
غیر کویتی مسافروں کو جائز ویزا کے ساتھ داخلے کی اجازت ہے بشرطیکہ وہ کویت پہنچنے کی تاریخ سے پہلے پچھلے 14 دنوں میں مندرجہ ذیل ممالک ہندوستان ، پاکستان ، نیپال ، بنگلہ دیش اور سری لنکا میں موجود نہ ہوں۔
ویکسی نیشن کی شرائط:
ریاست کویت سے باہر ویکسی نیشن کے لیے درج ذیل وزارت صحت کی ویب سائٹ پر ڈیٹا اپ لوڈ کرنا ضروری ہے۔
https://vaxcert.moh.gov.kw/SPCMS/PH/CVD_19_Vaccine_External_RegistrationAR.aspx
مندرجہ ذیل ویکسین ریاست کویت میں منظور شدہ ہیں:
- فائزر بائیو این ٹیک ویکسین کی دو خوراکیں۔
- آسٹرازینیکا آکسفورڈ کی دو خوراکیں۔
- موڈرنا ویکسین کی دو خوراکیں۔
- جانسن اینڈ جانسن ویکسین کی ایک خوراک۔
اہم ایپس اور ویب سائٹس:
- ویب پلیٹ فارم Kuwait Mosafer ایپلی کیشن نہیں ہے یہ ویب پلیٹ فارم ہے جسے مندرجہ ذیل لنک سے ڈاؤن لوڈ کیا جاسکتا ہے۔
- https://kuwaitmosafer.gov.kw/home.html
- جبکہ Immune اور Kuwait Mobile ID ایپلی کیشن ہیں انکا ڈاؤن لوڈ کرنا بھی ضروری ہے۔
- بلسلامہ (BelSalamah) پیکج صرف آرٹیکل 20 (خادم ویزا) مسافروں کے لیے ہے۔ یہ پیکیج کویت میں ان کے داخلے کی پوری ضروریات کا احاطہ کرتا ہے جیسے قرنطین اور آمد پر PCR ٹیسٹ چارجز وغیرہ۔
غیر ملکی مسافر جنہیں جائز ویزے، رہائشی اقاموں کے ساتھ ملک میں داخل ہونے کی اجازت ہے مندرجہ ذیل شرائط پوری کرکے ہی ملک میں داخل ہوسکتے ہیں۔
- صرف مکمل ویکسین شدہ مسافروں کو ہے ملک میں داخلے کی اجازت ہے۔ کویت میں مکمل طور پر ویکسین وصول کرنے والے اور کویت موبائل آئی ڈی ایپلی کیشن یا امیون ایپلی کیشن میں سبز ویکسین اسٹیٹس والے مسافر داخل ہوسکتے ہیں یعنی بیرون ممالک کویت کی منظور شدہ ویکسینوں میں سے کسی بھی ایک ویکسین کی دو خوراکیں وصول کرنے والے بشرطیکہ انہوں نے کویت وزارت صحت ویب سائٹ پر سرٹیفکیٹ اپ لوڈ کر دیا ہو اور وزارت صحت نے اسے منظور بھی کیا ہو۔ 16 سال سے کم عمر بچے بغیر ویکسین کے سفر کرسکتے ہیں بشرطیکہ وہ مکمل ویکسین شدہ بالغ فرد کے ہمراہ ہوں۔
- تمام تفصیلات (سول شناختی نمبر ، پاسپورٹ نمبر اور مسافر کا نام IMMUNE ایپلی کیشن میں درج کرنا لازمی ہے۔
- مسافروں کے لئے منفی PCR ٹیسٹ لازمی ہے جس کی معیاد 72 گھنٹے سے زیادہ نہیں ہونی چاہیے۔ یہ شرط 6 سال سے کم عمر کے بچوں پر لاگو نہیں ہوگی۔
- مسافروں کو Shlonik ایپلی کیشن میں رجسٹریشن کرنی ہوگی اس کے علاوہ فلائٹ نمبر اور تاریخ کے مطابق Kuwait Mosafer پلیٹ فارم میں مکمل رجسٹریشن بھی لازمی ہے۔
- مسافروں کو 7 دن گھر میں قرنطینہ میں رکھا جائے گا تاہم وہ کویت آمد کے بعد ایک PCR ٹیسٹ کرواکر منفی رپورٹ کے ساتھ قرنطینہ ختم کر سکتے ہیں۔
- غیر ویکسین شدہ زمرہ ریاست کویت میں داخل ہونے کا مجاز نہیں ہے تاہم یہ پابندی کویت کی وزراء کی کونسل کی طرف سے جاری کردہ مخصوص داخلی منظوری والے مسافروں پر لاگو نہیں ہوتی لیکن مستثنیات کے باوجود انہیں بھی منفی PCR ٹیسٹ رپورٹ پیش کرنا ہوگی۔ یہ شرط 6 سال سے کم عمر کے بچوں پر لاگو نہیں ہوگی۔
- مخصوص اجازت والے افراد بھی SHLONIK ایپلی کیشن میں رجسٹریشن مکمل کروائیں گے اور فلائٹ نمبر اور تاریخ کے مطابق Kuwait Mosafer پلیٹ فارم میں مکمل رجسٹریشن بھی کروانی ہوگی۔ Kuwait Mosafer پلیٹ فارم کا استعمال کرتے ہوئے دو PCR ٹیسٹوں (آمد کے لیے) کی ادائیگی کرنی ہوگی (2 ٹیسٹ کے لیے 40KWD) دینار ادا کرنے ہوں گے۔
- نامزد ہوٹلوں میں سے کسی ایک میں Kuwait Mosafer پلیٹ فارم کا استعمال کرتے ہوئے 7 دن کا ادارہ جاتی ہوٹل قرنطینہ پیکج منتخب کرنا ہوگا۔