کویت اردو نیوز 4جون:محبت میں سات سمندر پار کرنے کے دعوے تو کیے جاتے ہیں لیکن بنگلادیش کی نوجوان لڑکی نے یہ سچ کر دکھایا۔
بھارتی میڈیا کے مطابق بنگلہ دیش سے تعلق رکھنے والی 22سالہ خاتون کرشنا منڈل اپنے پیار سے ملنے اور شادی کرنے کے لیے ایک گھنٹہ تیرنے کے بعد دریا عبور کر کے بھارتی ریاست مغربی بنگال میں پہنچ گئیں۔
بھارتی میڈیا کے مطابق بنگلادیشی لڑکی کرشنا منڈل اور بھارتی نوجوان ابھیک منڈل کی محبت کا آغاز سماجی رابطوں کی ویب سائٹ فیس بک سے ہوا تھا اور پھر الگ الگ ملکوں سے تعلق رکھنے کے باوجود دونوں ایک دوسرے کی محبت میں مبتلا ہو گئے۔
کرشنا اپنے پیار سے ملنے کے لیے بے چین تھیں لیکن ان کے پاس بھارت کا قانونی طور پر دورہ کرنے کے لیے پاسپورٹ نہیں تھا جس کی وجہ سے انہوں نے غیرقانونی طور پر دریا عبور کر کے بھارت جانے کا ارادہ کیا۔
جس کے لیے سب سے پہلے کرشنا نے خطرناک بنگال ٹائیگرز اور جنگلی جانوروں سے بھرے سندربن جنگلات کو عبور کیا۔
تن تنہا جنگل عبور کرنے کے بعد لڑکی نے دریا عبور کرنے کا فیصلہ کیا اور ایک گھنٹہ تیرنے کے بعد دریائے مالٹا عبور کر کے مغربی بنگال پہنچ گئیں۔
اس کے بعد کرشنا بالآخر مغربی بنگال کے ضلع پرگاناس کے گاؤں میں پہنچ گئی اور ابھیک منڈل سے ملاقات کی اور دونوں نے کلکتہ جاکر کورٹ میرج کرلی۔
سوشل میڈیا پر شادی کی تصاویر وائرل ہونے پر پولیس حرکت میں آئی اور غیرقانونی طور پر بھارت میں داخل ہونے پر کرشنا کو گرفتار کر لیا اور جلد لڑکی کو بنگلا دیش ہائی کمیشن کے سپرد کردیا جائے گا۔
