کویت اردو نیوز 08 جون: خیبر پختونخوا حکومت کی دبئی ایکسپو میں کامیاب شرکت کے نتائج آنا شروع ہو گئے۔ صوبے میں کویت کی جانب سے سرمایہ کاری کے حوالے سے بڑی خبر سامنے آ گئی ہے۔
تفصیلات کے مطابق کویتی سرمایہ کار کمپنی صوبے میں ایک ارب ڈالر کی سرمایہ کاری کرے گی۔ صوبائی حکومت نے کویتی سرمایہ کار کمپنی انرٹیک ہولڈنگ کو سرمایہ کاری کے لئے باقاعدہ "لیٹر آف انٹینٹ” جاری کردیئے گئے ہیں۔ انرٹیک ہولڈنگ خیبر پختونخوا میں تین اہم منصوبوں میں سرمایہ کاری کرے گی۔ انرٹیک ہولڈنگ صوبے میں دو گرین ہائیڈروجن پلانٹس منصوبوں پر 250 ملین ڈالر کی سرمایہ کاری کرے گی۔ ان منصوبوں میں 84 میگاواٹ گورکن مٹلتان اور 69 میگاواٹ لاوی شامل ہیں۔ انرٹیک ہولڈنگ خان پور میں سیٹلائٹ اینڈ سمارٹ سٹی کے قیام پر 750 ملین ڈالر کی سرمایہ کاری کرے گی۔
سیٹلائٹ اینڈ سمارٹ سٹی منصوبے کی تکمیل کے بعد تین سے چار ارب ڈالر کی سرمایہ کاری متوقع ہے۔ اس منصوبے کی تکمیل سے سالانہ 80 سے 100 ملین ڈالر کی معاشی سرگرمیاں پیدا ہوں گی۔ انرٹیک ہولڈنگ کو "لیٹر آف انٹینٹ” جاری کرنے کے لئے وزیر اعلی ہاوس میں تقریب کا انعقاد کیا گیا۔
وزیر اعلی خیبر پختونخواہ محمود خان تقریب کے مہمان خصوصی تھے۔ صوبائی کابینہ اراکین، انرٹیک ہولڈنگ کے سی ای او اور متعلقہ سرکاری حکام نے بھی شرکت کی۔ دوبئی ایکسپو میں خیبر پختونخواہ حکومت کی کامیاب شرکت کے حوصلہ افزا نتائج سامنےآرہے ہیں، صوبائی حکومت نے دوبئی ایکسپو میں غیر ملکی سرمایہ کمپنیوں کے ساتھ 8 ارب ڈالر کے 44 ایم او یوز پر دستخط کئے تھے۔ وزیراعلٰی خیبر پختونخواہ نے کہا کہ "کویتی سرمایہ کار کمپنی کی طرف سے صوبے میں سرمایہ کاری انتہائی خوش آئند ہے، صوبے میں خطیر سرمایہ کاری کرنے پر انرٹیک ہولڈنگ کے منتظمین کا مشکور ہوں”۔
"صوبائی حکومت کمپنی کو ہر ممکن سہولیات اور تعاون فراہم کرے گی”۔ انہوں نے مزید کہا کہ ” یہ سرمایہ کاری صوبے میں مزید غیر ملکی سرمایہ کاری کے لیے راہیں کھولے گی،گرین ہائیڈروجن پلانٹس منصوبے صوبے میں ماحول دوست توانائی کو فروغ دینے میں سنگ میل ثابت ہوں گے”۔
سیٹلائٹ اینڈ سمارٹ سٹی کا قیام صوبے میں پائیدار شہری ترقی کے لئے بنیادیں فراہم کرے گا، خیبر پختونخوا میں غیر ملکی سرمایہ کاری کے لئے سازگار ماحول ہے، صوبائی حکومت غیرملکی سرمایہ کاروں کو ایک ہی چھت تلے تمام خدمات اور سہولیات فراہم کر رہی ہے۔ صوبائی حکومت غیر ملکی سرمایہ کاری کو فروغ دے کر لوگوں کو روزگار کے مواقع فراہم کرنے کے لئے جامع منصوبہ بندی کے تحت اقدامات اٹھا رہی ہے، صوبائی حکومت کے دور رس اقدامات کے نتیجے میں صوبہ تجارتی، صنعتی اور معاشی سرگرمیوں کا مرکز بن جائے گا، خیبر پختونخوا کو پائیدار ترقی پر گامزن کردیا ہے۔
