کویت اردو نیوز : پاکستان کی وزارت مذہبی امور نے حج 2024 ء کے انتظامات مکمل کر لیے ہیں۔
ملک بھر کے 8 ایئرپورٹس پر حج آپریشن ہوگا۔ پاکستان سے عازمین حج کے لیے فلائٹ آپریشن 9 مئی سے شروع ہوگا اور بغیر کسی رکاوٹ کے 9 جون تک جاری رہے گا۔
وزارت مذہبی امور کے مطابق جن ایئرپورٹس پر حج پروازیں چلیں گی ان میں کراچی، ملتان، کوئٹہ، اسلام آباد، لاہور، سکھر، سیالکوٹ، رحیم یار خان شامل ہیں۔ پشاور کے عازمین اسلام آباد ایئرپورٹ جائیں گے جبکہ فیصل آباد کےعازمین لاہور ایئرپورٹ کے ذریعے سعودی عرب جائیں گے۔
حج فلائٹ آپریشن میں چار ایئر لائنز شرکت کریں گی: سعودی ایئر لائنز، پی آئی اے، سیرین اور ایئر بلیو۔ کراچی ایئرپورٹ پر پہلی بار روڈ ٹو مکہ سروس شروع کی جائے گی۔ اسلام آباد ایئرپورٹ پر روڈ ٹو مکہ سروس بھی دستیاب ہوگی۔ روڈ ٹو مکہ منصوبے کے تحت عازمین کی امیگریشن پاکستان میں ہوگی۔
سرکاری حج سکیم کے تحت 69 ہزار 500 عازمین حجاز مقدس جائیں گے۔ وزارت مذہبی امور کے مطابق عازمین حج کی ویکسی نیشن کا عمل 30 اپریل سے 10 حج کیمپسز میں شروع ہوگا۔
