کویت اردو نیوز 10 جولائی: سعودی عرب کے ساحلی شہر جدہ میں واقع شاہ عبدالعزیز انٹرنیشنل ایئرپورٹ (کے اے آئی اے) سے منسلک الحرمین ٹرین اسٹیشن کسی ہوائی اڈے سے منسلک دنیا کا سب سے بڑا ٹرمینل ہے جس کا رقبہ 99 ہزار مربع میٹر ہے۔
ہوائی اڈے کا یہ ٹرمینل الحرمین ایکسپریس پروجیکٹ کے اسٹیشنوں کا حصہ ہے۔ اس میں مکہ مکرمہ، مدینہ منورہ، جدہ اور ربیغ شاہ عبداللہ اکنامک سٹی بھی شامل ہیں۔ شاہ عبدالعزیز بین الاقوامی ہوائی اڈہ مشرقِ اوسط کا واحد ائیرپورٹ ہے جوکسی ریلوے اسٹیشن سے جڑا ہوا ہے۔ سعودی پریس ایجنسی کی رپورٹ کے مطابق ہوائی اڈے کے ٹرمینل میں ایک وقت میں چھ ٹرینیں ہوتی ہیں جو کہ مصروف اوقات میں ہر دس منٹ کے بعد سفرپر روانہ ہوتی ہیں۔ یہ منصوبہ مملکت کے اندرون اور بیرون سے آنے والے عمرہ زائرین کی بڑھتی ہوئی
تعداد کی سفری ضروریات کو پورا کرنے اور مکہ مکرمہ، جدہ اور مدینہ منورہ کی شاہراہوں پرٹریفک کا دباؤ کم کرنے کے لیے ڈیزائن کیا گیا ہے۔ رپورٹ میں مزید کہا گیا ہے کہ سعودی عرب ہی سے تعلق رکھنے والے 40 سے زیادہ مرد و خواتین اعلیٰ تعلیم یافتہ اہلکار ایک شفٹ میں اسٹیشن کا انتظام کرتے ہیں۔ الحرمین ٹرین کا یہ منصوبہ سعودی عرب کے ویژن 2030ء کے تقاضوں کی تعمیل کے لیے وضع کیا گیا ہے۔
