"خابی لام” معروف سوشل میڈیا ایپ ٹک ٹاک سٹار گزشتہ چند سالوں میں پوری دنیا کی توجہ کا مرکز بن گیا ہے۔ 22 سالہ سینیگالی جو اب اطالوی (اٹلی) نیشنل ہے اس وقت بین الاقوامی توجہ کا مرکز بنا جب اس کی خاموش لیکن مزاحیہ طنزیہ ٹک ٹاک ویڈیوز وائرل ہوئیں۔
خیال کیا جاتا ہے کہ "خابی لام” اس وقت دنیا کا سب سے زیادہ فالو کیا جانے والا "ٹک ٹاکر” ہے۔ لام ایک سال کا تھا جب اس کا خاندان سینیگال سے ہجرت کر کے اٹلی کے ایک چھوٹے سے قصبے میں آیا تھا جہاں وہ اپنے تین بہن بھائیوں کے ساتھ نہایت تنگدستی کے حالات میں پلا بڑھا۔ 2020 میں عالمی وباء کوویڈ کے پھیلنے کے باعث ایک مشین آپریٹر کی حیثیت سے اپنی ملازمت سے ہاتھ دھونا پڑا جو کہ اس کا واحد ذریعہ معاش تھا۔ پوری دنیا کے ساتھ ساتھ اس کے شہر میں بھی لاک ڈاؤن لگ گیا جس سے اس کے حالات مزید بدتر ہو گئے چنانچہ وقت گزارنے کے لئے اس نے سوشل میڈیا خاص طور پر معروف ایپلی کیشن "ٹِک ٹاک” کا سہارا لیا جیسا کہ
بہت سے دوسرے نوجوان امید پرستوں نے کیا ہے، اس نے بھی اپنی ویڈیوز بنانا اور پوسٹ کرنا شروع کیں جن میں سے اکثر اسے رقص کرتے ہوئے اور ویڈیو گیمز پر اس کے ردعمل کو دکھاتے دیکھا گیا لیکن جس چیز نے اسے بہت زیادہ مقبولیت دلائی وہ یہ تھی کہ جب اس نے ‘لائف ہیک’ ویڈیوز پر طنز کیا جس میں دکھایا گیا کہ کس طرح پیچیدہ کام آسانی سے اور کسی آواز کی مدد کے بغیر کیے جا سکتے ہیں۔ سال 2021 اپریل میں
اس نے سب سے زیادہ فالو کیے جانے والے اطالوی ٹک ٹاکر "گینلوکا ویچی” کو پیچھے چھوڑ دیا جبکہ موجودہ اعدادوشمار کے مطابق خابی لام عالمی سطح پر سب سے زیادہ فالو کیا جانے والا ٹک ٹاکر بن چکا ہے۔ 22 سالہ خابی لام ٹک ٹاک پر سب سے زیادہ فالو کئے جانے والا شخص ہیں جس نے تقریباً 149.5 ملین فالوورز کے ساتھ امریکی چارلی ڈی امیلیو کو پیچھے چھوڑ دیا۔ نیویارک ٹائمز نے اس کی مقبولیت کو ایک مثال کے طور پر پیش کرتے ہوئے اس کی کامیابی کو ” مایوس کن افراد” کی حوصلہ افزائی سے منسوب کیا۔ کچھ لوگوں نے اس کی ویڈیوز کا موازنہ ‘مسٹر بین’ (روون ایٹکنسن) سے کیا ہے۔ امریکی مارکیٹنگ ایجنسی تھرٹی 6 فائیو کی بانی کرسٹینا فیراز کہتی ہیں کہ "اس کا غصہ متعلقہ ہے اور احساسات عالمگیر ہیں۔”
مشہور ٹک ٹاک شخصیت "خابی لام” نے انکشاف کیا کہ وہ اپنی پوسٹ کردہ ہر ویڈیو سے تقریباً 750,000 ڈالر کماتا ہے جس سے وہ 2022 میں 10 ملین ڈالر (01 کروڑ ڈالر) حاصل کرنے کے راستے پر گامزن ہیں۔ انہیں 8 جون کو اطالوی وزارت داخلہ نے اٹلی کی شہریت دینے کی بھی منظوری دے دی اور اب وہ ایک اطالوی شہری ہیں۔
صحافیوں سے بات کرتے ہوئے لام نے بتایا کہ انہیں اپنی قومیت پر "انتہائی فخر” محسوس ہوا اور "جج کے سامنے انہوں نے جو حلف اٹھایا اس کے لیے ایک بڑی ذمہ داری” محسوس کی۔ خیال رہے کہ "ٹک ٹاک کے بادشاہ” کے نام سے مشہور "خابی لام” ایک مسلمان گھرانے سے تعلق رکھتے ہیں اور وہ ایک حافظ قرآن بھی ہیں۔
